NAVENDA NÛÇEYAN - Îlham Ehmed diyar kir ku HTŞ'ê peyman binpê kiriye û got: "Em rêveberiya Şamê bi tevahî berpirsiyar dibînin ji ber teşwîqkirina tundûtûjiyê li dijî HSD'ê."

 

Hevseroka Beşa Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed, li ser hesabê xwe yê X'ê diyar kir ku HTŞ û komên pê ve girêdayî peymanê li Meskenê binpê kirine.

 

Îlham Ehmed got: "Duh Hêzên Sûriya Demokratîk (HSD) qebûl kirin ku hêzên xwe ji aliyê rojavayê Firatê, tevî bajarokên Dêr Hafir û Meskenê, vekişînin. Lêbelê, hêzên girêdayî rêveberiya Şamê bi eşkereyî ev peyman binpê kirine. Li Meskenê di navbera aliyan de pevçûnên tund diqewimin. Em rejîma Şamê ji ber vê binpêkirinê û ji ber teşwîqkirina tundûtûjiyê li dijî HSD'ê bi tevahî berpirsiyar dibînin."