Melek Avci 

 

ENQERE - Ebru Gunay, diyar kir ku divê şert û merc ji bo Abdullah Ocalan werin afirandin da ku bi awayekî azad bixebite û got, "Pir girîng e ku pêvajoyek were afirandin ku aktorê sereke bikaribe bi awayekî azad bi raya giştî ya cîhanê re hevdîtin bike û vê yekê rasterast bi rêxistina xwe re nîqaş bike. Divê rêziknameyên qanûnî yên pêwîst ji bo avakirina civakek demokratîk bêyî derengmayîn werin çêkirin."

 

Daxuyaniyeke nû ya Rêberê Gelê Kurd Abdullah Ocalan derbarê salvegera yekem a banga wî ya "Aştî û Civaka Demokratîk" a 27'ê Sibata 2025'an de bi raya giştî re hat parvekirin. Hevberdevka Komîsyona Têkiliyên Derve ya Partiya Wekhevî û Demokrasiya Gelan (DEM Partî) Ebru Gunay, diyar kir ku Abdullah Ocalan divê vê salvegerê rasterast bi raya giştî re parve bikira û tekez kir ku pêwîst e rêziknameyên qanûnî yên ku di daxuyaniyê de hatine behs kirin di zûtirîn dem de werin bicîhanîn.

 

Avakirina komara demokratîk

 

Ebru Gunay, diyar kir ku peyama nû ya Rêberê Gelê Kurd Abdullah Ocalan pir girîng e û wiha bi lêv kir: "Piştî salekê, peyam hîn jî li ser aştî û civakeke demokratîk israr dike û naveroka wê vê yekê nîşan dide. Yek ji dînamîkên sereke yên di peyamê de, yek ji beşên herî berbiçav, tekez li ser wê yekê bû ku komara demokratîk bêyî Tirk û Kurdan nikare hebe. Li cihekî ku gelên li Rojhilata Navîn li dijî hev têne danîn û têne birin zemînek nakok, tekez li ser wê yekê ku gel hîn jî dikarin xwe di avakirina komara demokratîk de temsîl bikin bê guman pir girîng e."

 

Meseleya aştiyê

 

Ebru Gunay bi vê peyama nû tekez kir ku avakirina civakeke demokratîk û aştî ji hev nayên veqetandin û diyar kir ku careke din eşkere bûye ku aramiya di civakê de wekhevî aştî û demokrasiyê ye û wiha axivî: "Meseleya aştiyê ne tiştek e ku tenê bi danîna çekan ji aliyê rêxistinekê û feshkirina xwe ve were bidestxistin. Ev yek dê bi avakirina demokrasiyê û qebûlkirina çarçoveya qanûnî jî gengaz be. Di nivîsê de her wiha aliyê qanûnî jî hate destnîşankirin. Tê de hate destnîşankirin ku pênaseya civakeke demokratîk bi pergala hiqûqî ya demokratîk ve girêdayî ye. Divê gavên qanûnî werin avêtin da ku hawîrdorek bê tundûtûjî û pevçûn bikaribe mayînde bibe."

 

Pêvajoya entegrasyona demokratîk

 

Ebru Gunay ku ji destpêkê ve tekez kir ku dînamîkên bingehîn ên pêvajoyê naskirina qanûnê û avakirina civatek demokratîk a li ser bingeha yekîtiya gelan e û wiha nêrînên xwe anî ziman: "Pêvajoya qanûnî dikare wekî pêvajoyek entegrasyona demokratîk bi tevahî were pênasekirin. Di dawiya salê de, wêneyek nû ya Birêz Ocalan hate weşandin. Lê ez dixwazim ku îro ew bi xwe li vir bûya, vê salê bi çapemenî û raya giştî re binirxîne. Ez hêvî dikim ku ev yek di pêvajoya pêşerojê de çêbibe."

 

Xalên bingehîn ên vê pêvajoyê

 

Ebru Gunay diyar kir ku pêwîst e şert û merc ji bo Abdullah Ocalan werin afirandin da ku li Girava Îmraliyê bi awayekî azad bixebite û wiha dawî li axaftina xwe anî: "Ev meseleya herî lezgîn e. Pir girîng e ku pêvajoyek were afirandin ku aktorê sereke yê pêvajoyê bikaribe bi awayekî azad bi raya giştî ya demokratîk û raya giştî ya cîhanê re hevdîtin bike û rasterast bi rêxistina xwe re li ser vê yekê nîqaş bike. Û bê guman, divê rêziknameyên qanûnî yên pêwîst ji bo avakirina civakek demokratîk bêyî derengmayîn werin danîn. Li ser vê mijarê, derbarê guhertina qanûna înfazê û pratîzekirina bi biryarên Dadgeha Mafên Mirovan a Ewropayê (DMME) û Dadgeha Destûrî de, ji komîsyona parlementoyê re referans û pêşniyar hebûn. Derxistina qanûnên ku ew jê re dibêjin qanûnên serbixwe û em jê re dibêjin qanûnên aştiyê û lezandina pêvajoyê, yek ji xalên bingehîn ên vê pêvajoyê ye. Di serdema nû de, pêkanîna bilez a van dê ji bo pêşveçûna pêvajoyê pir girîng be."