NAVENDA NÛÇEYAN- Piştî lehiyan, li kampên Waşûkanî û El-Telae yên Hesekê şertên jiyanê girantir bû. Komîteya Koçberên Serêkaniyê bang kir ku beriya zivistanê kon bên temîrkirin û veger bên lezkirin.

 

Şertên mirovî yên malbatên koçber ên ku li kampên Waşûkanî û El-Telae yên li parêzgeha Hesekê ya Sûriyeyê dijîn, piştî baran û lehiyên dawî girantir bû. Komîteya Koçberên Serêkaniyê bang kir ku beriya zivistanê piştgiriya bi lez a stargehê bê dayîn û pêvajoya vegera malbatan a li warên wan bê lezkirin.

 

Berdevkê Komîteyê Mehmûd Cemîl di daxuyaniya Shafaq Newsê de diyar kir ku konên li her du kampan kevin bûne û êdî li ber baran, serma û germahiyên zêde nikarin parastineke têrker bikin. Cemîl da zanîn ku komîteyê ev heft sal in ji saziyên alîkariya mirovî piştgirî û konên nû xwestine, lê ev daxwaz bi qasî tê xwestin bi cih nehatine.

 

Daxwaza lezkirina vegeran hat kirin

 

Di daxuyaniyê de hat diyarkirin ku di vegera malbatên koçber a ji bo warên wan de derengketinên îdarî û astengiyên cihêreng çêdibin û bang li hikûmeta Sûriyeyê kir ku qada karwanên vegerê yên bi organîze berfireh bike û hejmara malbatên ku wê vegerin zêde bike.

 

Mehmûd Cemîl ji heyeta Serokatiya Sûriyeyê, saziyên navneteweyî û Komîseriya Bilind a Penaberan a Neteweyên Yekbûyî (UNHCR) yên ku pêvajoya vegerê dişopînin xwest ku beriya zivistanê şert û mercên jiyana li kampan dijwartir bibe, piştgiriyê bidin lezkirina vegeran.

 

3 hezar û 278 malbat vegeriyan

 

Bi 6 karwanên vegerê yên organîzekirî ku ji meha Tebaxê ve hatine birêxistinkirin bi giştî 3 hezar û 278 malbat vegeriyan warên xwe.

 

Beşek ji malbatan vegeriyan Serêkaniyê û gundewarên wê, yên din jî ji bo bicihbûnê vegeriyan gundên derdora Til Temir, Zirgan û Ebû Rasîn ên li bakurê Hesekê.