'Em ê Komkujiya Helebcê ji bîr nekin'

  • 13:24 16 Adar 2026
  • Rojane
NAVENDA NÛÇEYAN -  Bi boneya salvegera Komkujiya Helebceyê li bajaran daxuyanî hat dayîn û wiha hat gotin: " Ji bo ku ev êşa mezin a ku di dîroka cîhanê de şop hiştiye neyê jibîrkirin û ji bo ku careke din tu hêz hewildaneke wiha li dijî gelê Kurd neke, têkoşîna me dê berdewam bike."
 
Bi wesîleya 38’emîn salvegera Komkujiya Helebceyê, li gelek bajaran daxuyanî hatin dayîn. 
 
Şirnex 
 
Ji hêla Platforma Saziyên Demokratîk (DEKUP), li Şirnexê li ber avahiya Rêxistina Partiya Wekhevî û Demokrasiyê ya Gelan (DEM Partî) a bajêr ji bo Helebçê daxuyaniyek hat dayîn. Di daxuyaniyê de pankarta “Em komkujiya Helebce şermezar dikin, ji bîr nakin” hat vekirin û gelek kes beşdarî daxuyaniyê bûn. 
 
Wan 
 
Li Wanê DEKUP, li Qada Kentê daxuyanî da û pankarta "Komkujiya Halepcê ji bîr neke" hat vekirin û nûnerên saziyên sivîl û partiyên siyasî û gelek kes beşdarî daxuyaniyê bûn. Her wiha piştî daxuyaniyê girse berê xwe da pêşangeha wêneyan a ku li avahiya KESK'ê hatî vekirin. 
 
Riha 
 
Platforma Ked û Demokrasiyê ya Rihayê li ber Novada Park AVM a li Xelîliyê daxuyaniyek da çapemeniyê. Bal kişand ser komkujiyê û têkoşîna li dijî komkujiyan. 
 
Mêrsîn 
 
Platforma Ked û Demokrasiyê ya Mêrsînê li Parka Zarokên Adaz daxuyanî da û bal kişand ser komkujiyên Halebce Gazî, Beyazîtê. Di daxuyaniyê de pankarta “Komkujî sûcê mirovahiyê ye" 
 
Amed
 
Bi pêşengiya Platforma Saziyên Demokratîk a Amedê li ÇandAmedê bi boneya salvegera 38'emîn a Komkujiya Helebceyê û bibîranîna qurbaniyên komkujiyê bernameya bîranînê li dar xist. Parlamenterê DEM Partiyê yê Amedê Serhat Eren, Hevşaredarên navend û navçeyên Amedê, endam û nûnerên platformê, endam û nûnerên partî, sazî û dezgehan tev li bîraninê bûn. Li eywanê find hatin pêxistin û qerenfîl danîn ser maseyê. Bernameyê bi rêzgirtinê dest pê kir. Di destpêka bernameyê de sînevîzyona ku li ser Helebceyê hatibû amadekirin hate nîşandan. Piştre Hevseroka DBPê ya Amedê Rûçem Vefa Elyakut û Parlamanterê Amedê Serhat Eren axivîn.
 
Erdîş
 
Platforma Ked û Demokrasiyê ya Wanê, bi boneya salvegera Komkujiya Helebceyê li Erdişê li pêşiya avahiya DEM Partiyê daxuyanî da. Hevserokê DEM Partıyê Veysi Dilekçi, Parlementerê DEM Partiyê Mahmut Dundar, Komeleya Melayan û gelek nûnerên saziyên sivîl û civakî tev li daxuyaniyê bûn. Daxuyaniyê Hevseroka DEM Partiyê ya navçeya Erdişê Yasemîn Agaoglu xwend.
 
Sêrt 
 
Platforma Saziyên Demokratîk a Sêrtê bi boneya salvegera Komkujiya Helebceyê ya ku di 16ê Adara 1988an de pêk hatibû, li pêşiya avahiya DEM Partiyê daxuyanî da. Di bîranînê de Hevserokên DEM Partiyê û DBPê yên Sêrtê, TJA, Baro, ÎHD, OHDa gelek rêveber û endamên saziyên civakî yên sivîl ên bajêr tev li daxuyaniya bîrarînê bûn. Girseya kombûyî dirûşma “Şehîd Namirin” berz kirin û pankarta “Em komkujiya Helebceyê ji bîr nakin” vekir. Daxuyaniyê Hevserokê DBPa Sêrtê Mustafa Dayanan xwend.
 
Edene 
 
Platforma Ked û Demokrasiyê ya Edeneyê jî li Parka Înonuyê daxuyanî da. Gelek kes tev li daxuyaniyê bûn. Daxuyanî, ji hêla Hevseroka Şaxa ÎHD’ê Yasemîn Dora Şekerê ve hate xwendin. Yasemîn Dora Şekerê kesên di komkujiyên Helebce û Beyazitê hatin qetilkirin bi bîr anî û got ku heta hesabê van komkujiyan tê pirsîn dê têkoşîna wan bidome. 
 
Hatay
 
Şaxa ÎHD’A Îskenderûn a Hatayê jî li pêşiya avahiya xwe daxuyanî da. Hevseroka Şaxê Ayten Kilinçê anî ziman ku heta Tirkiye komkujiya Helebceyê weke “Komkujiya li Dijî Kurdan” nas dike dê têkoşîna xwe bidomînin.  
 
Di daxuyaniya hevpar de wiha hat gotin: 
 
"Me Komkujiya Helebçeyê Ji Bîr Nekir, Em ê ji bîr nekin!
 
Berî 38 salan, di 16’ê Adara 1988’an de, komkujiya Helebceyê ya ku li Iraqê ji aliyê rejîma Baasê û dîktator Sedam Huseyîn ve hat pêkanîn, wek yek ji rûpelên herî tarî yên dîroka mirovahiyê di bîranînan de hatiye neqşkirin. Di vê êrişa ku tê de çekên kîmyewî û biyolojîk hatin bikaranîn de, zêdetirî 5 hezar Kurdan jiyana xwe ji dest da, bi hezaran kes birîndar bûn û encamên giran ên mirovî yên ku dê bi nifşan bidomin derketin holê. Ev sûcê ku li Helebceyê hat kirin, ne tenê li dijî gelê Kurd, li dijî hemû mirovahiyê hatibû kirin.
 
Lêgerîna gelan a ji bo edaletê 
 
Rêveberiya Baasê ya wê demê li Iraqê, bi salan hewl da ku daxwazên gelê Kurd ên ji bo wekhevî, azadî û mafên demokratîk bi şîdeta dewletê, zext û rêbazên leşkerî bitepisîne. Komkujiya Helebceyê jî bû yek ji mînakên herî hov ên vê polîtîkayê. Lê belê dîrokê bi eşkereyî nîşan daye ku; komkujî, qedexe û polîtîkayên zextê nekarîne têkoşîna azadî û wekheviyê ya gelan ji holê rakin. Tevî êşa giran a li Helebceyê, gelê Kurd dest ji têkoşîna xwe ya mafdar berneda û bi destkeftiyên ku bi dest xistin, ji bo geşedanên demokratîk ên li herêmê jî bû xwedî kedeke girîng. Dîrokê careke din nîşan da ku; rêbazên zext û şîdetê dikarin têkoşînên demokrasî û azadiyê bi rengekî demkî bitepisînin, lê nikarin ji holê rakin. Tevî ku çekên kîmyewî bên bikaranîn jî, lêgerîna gelan a ji bo edalet û azadiyê bi komkujî û şîdetê nayê sekinandin.
 
Alozî û şerên ku li Rojhilata Navîn 
 
Geşedanên herêmî û gerdûnî yên îro jî îşaret bi xalên nû û krîtîk dikin. Alozî û şerên ku li Rojhilata Navîn mezin dibin, gelan careke din bi rîsk û xetereyên mezin re rû bi rû dihêlin. Di vê pêvajoyê de, yên ku li bendê ne gelê Kurd di navbera hêzên hegemon û rejîmên paşverû û otorîter ên herêmê de tercîhekê bike, dê şaş bikin. Gelê Kurd ne mehkûmê navendên hêzên hegemon e, ne jî mehkûmê rejîmên zordar e.
 
Bingeha wekheviya gelan
 
Têkoşîna gelê Kurd, bi têgihîştina “Rêya Sêyemîn” a ku li ser bingeha wekheviya gelan û paşeroja demokratîk ava bûye, di herikîna xwe de berdewam e. Ev nêzîkatî diparêze ku azadî, aştî û çareseriya demokratîk bi vîna gelan bi xwe pêkan e. Gelê Kurd êdî ne çavkaniyeke mirovî ye ku tu hêz di demên teng de bikar bîne. Gelê Kurd gelek e ku hem li qadê û hem jî di qada dîplomasiyê de hebûna xwe îsbat kiriye û tu nêzîkatiyeke siyasî ya ku vê rastiyê nebîne, şansê wê yê serkeftinê nîne.
 
Têkoşîna me dê berdewam bike.
 
Di salvegera komkujiya Helebceyê de; em kesên ku ev êrişa dijminê mirovahiyê pêkanîne careke din lenet û şermezar  dikin, yên ku jiyana xwe ji dest dane bi rêz, minet û bi xemgîniyeke kûr bi bîr tînin. Ji bo ku ev êşa mezin a ku di dîroka cîhanê de şop hiştiye neyê jibîrkirin û ji bo ku careke din tu hêz hewildaneke wiha li dijî gelê Kurd neke, têkoşîna me dê berdewam bike."