DÎLOK - Krîzê ekonomî têkoşînê ciwîyayîşî yê esnafan giran kena û Sûka Sifirrotoxan ke zêdeyêr mêrdeyî tede est ê, esnafê cinîyî, vera zor û zehmetîyanê ekonomî û fehmê vera cinîyan têkoşîn kenê. Humeyra Durmaz ya antîkakere vatişê ‘ez nêeşkena bikera’ red kerd û veng da cinîyan ke azadîya xo ya ekonomî bigîrê destê xo.

 

Şert û mercê ekonomî her ke şinê giran benê û no rasterast tesîr serê cuya rojane yê mîlyonan merdiman ser o keno. Meseleyê rojane û problemê ciwîyayîşî zor dano esnafan û bi taybetî cinîyî tewrê têkoşînê ekonomî mîyanê cuya xebate de zî zehmetîyan ancenê. No tablo her meslegî de xo mojneno. Sûka Sifirrotoxan ê Dîlokî de zî zêdeyêr esnafê mêrdeyî est ê û cinîyê mîyanê sûke zî sey her wareyî tiya de zî zehmetîyan ancenê. Yew esnafanê cinîyan ê sûke Humeyra Durmaz a.

 

Humeyra Durmaz Sûka Sifirrotoxan de dikanê ci yê antîka est o û bi nê dukanî debara xo kena. Humeyra Durmaz derheqê cuya rojane ya sûke û krîza ekonomî de qisey kerd.

 

‘Ma emser sezonêk nêbaş ciwîyenê’

 

Humeyra Durmaz vat bi serran o dikanê aye yê antîka est o û nê çîyî qal kerd: “No dikan 1950î ra hetanî nika yê ma yo. Vernê de kalikê mi, dima ra babî û birayê mi, nika zî ez kena. Ma meslegê xo bi heskerdene kenê. Antîkakerî xebatêk weş a. Merdim kulturê cîyayî nas keno. Nê hetî ra weş o labelê hetê ekonomî de zehmet o. Welatê ma krîzêk giran de yo. Dîlok hetê kulturî ra zaf ame vurnayene, bîyo bajarê turîzmî. Merdimî yenê tiya de geyrenê. Merdimî yenê geyrenê, tehm kenê, diyarîyê qican gênê û şinê. Labelê dayîş û girewtiş nêkenê. Ma sezonêk xirab ciwîyenê.”

 

‘Semedê cinîyan ware nêameyo akerdene’

 

Humeyra Durmaz dîyar kerd ke zêdeyêr esnafê sûke mêrde yê û wina vat: “Mi dikan semedê na rewşe girewt. Semedê nasnameyê cinîye mi zehmetî ant. Zor û zehmetîyê ke cinîyî ancenê est ê. Kulturê sûke vernê de vera cinîyan girewre bi. Verê zêdeyêr mêrdeyî bîyî. Dimayê nê caye bîyî cayê turîzmî cinîyî ameyî. Ma newe yê. Vindertişê ma muhîm o. Kulturê tîya cîya yo. Bi eynî kulturî pîl bîyî. Semedê cinîyan zaf ware nêameyo akerdene.”

 

‘Ganî cinîyî vatişê ‘ez nêeşkena bikera’ red bikerê’

 

Humeyra Durmaz wina peynî da qiseykerdişê xo: “Ganî cinîyî ekonomîya xo, azadîya xo ya ekonomî bigîrê destê xo. Semedê na babete ganî têkoşîn bikerê. Ganî qetî çîyêk dir meşgul bibê. Ganî cinîyî nêewnê destê kesî ra. Nika heme esnafî dikananê xo gênê. Ganî cinîyî vatişê ‘ez nêeşkena bikera’ red bikerê. Cinîyî biwazê şênê her çîyî bikerê.”