Melek Avci

 

ANQARA - Verfeka DEM Partîyî Ayşegul Dogan derheqê prosesî de sernameyê krîtîkî yê rojê vernî ercna û va ke programo ke dimayê qanûnî do bêro awankerdiş, heta rolê Rayberê Şarê Kurdî Abdullah Ocalan û heta îmkanê pêvînayîşan pabeyê gaman est o.

 

Çarçeweya prosesê Aştî û Cimatê Demokratîkî de "Qanûnê Derheqê Xurtkerdişê Yewbîyayîşê Neteweyî û Yewparebîyayîşê Komelî" ke sey Qanûnê Çarçewa yeno zanayîş, kewtî merîyet û yeno pabebîyayîş ke bêro pratîkkerdiş. Dimayê qanûnî 24ê tebaxe de binê serekîya Temsîlkarê Serekwezîrî Cevdet Yilmaz de kombîyayîşo verêne ame kerdiş. Kombîyayîş de çar komîsyonê binî ameyî awankerdiş û qerar ame girewtiş ke xebatî serê nê komîsyonan de bêrê domnayîş.

 

Programê derheqê caardişê qanûnî, şekilê xebatanê heyetan, merkezbîyayîşê Rayberê Şarê Kurdî Abdullah Ocalanî, bêçekbîyayîşî dir derbazbîyayîşê sîyasetê demokratîkî û sewbîna hema zelal nêbîyî.

 

Verfeka DEM Partîye Ayşegul Dogan derheqê mesela de qisey kerd.

 

Ayşegul Dogan va ke nêzelalî derheqê kewtişê merîyetî yê qanûnî rayepêroyî de vernîya munaqeşeyan akerd û na mesele de pabebîyayîş est o û va: "Qanûno ke vejîya gama destpêkî yo la qîm nêkeno. Pêwa heme rexneyanê ma no qanûn vejîya, hetê dîyarkerdişî yê çarçeweya bêçekbîyayîşî de gamêk destpêkî yo. Ma pabeyê ke rojê vernî bi averşîyayîşanê neweyî dir bikewê qonaxêk neweyî. Derheqê bêçekbîyayîşî ver bi sîyasetî pabebîyayîşê ma semedê astêk neweyî est o. Qerarê DHMEyî û DDByî semedê her kesî têduşt pê nêyeno. Na meselaya neweyî yê Tirkîya nîyê. Mesela ke her şîya giranêr bîya. Demokrasî zî tîya de zaf wareyî de krîz viraşt. Bêguman lazim o ke qerarê DHMEyî û DDByî pê bêrê. Lazim o ke madeyê raporê hembeşî yê Komîsyonê Demokrasî û Wayê-Birayî Yewbîyayîşê Neteweyî verê çiman de bêrê girewtiş û Tirkîya peymananê ke terefgirê aye yo pê bîyaro. Lazim o ke lezkî qerarê DHMEyî û DDByî pê bêrê."

 

'Agahî û programê derheqê heyetan de çin o'

 

Ayşegul Dogan va ke ê rojê bêrê de pabeyê ke nê nêzelalî orte ra bêrê wedaritiş û wina dewam kerd: "Derheqê ke heyetê senîn xebate kenê de hema programêk çin o, tu çî rayepêroyî dir nêame parekerdiş. Nê derheqî de zî pabebîyayîş est o. Nê heyetî kamî ra awan benê no zî nêyeno zanayîş. Ancî derheqê ke Birêz Ocalan nê heyetan dir senîn xebate keno de eşkerayîyêka fermî çin a. Nê derheqî de hema nêzelalî est a. Lazim o ke nê lezkî bêrê çareserkerdiş. Yan zî do nê nakokîyê bêbawerî zî viraznê. Nika piştîdayîşê şarî esto. Her kes aştî wazeno. Lazim o ke metod zelal bibo. Rayepêroyî dir bêrê parekerdiş."

 

'Yê kordînasyonî bikero Birêz Ocalan o'

 

Ayşegul Dogan va ke eke waştişê bêpêrodayîşî bi hawayêk manader bivurîyo sîyasetê demokratîkî, yê nê bikero aktorê esasî Rayberê Şarê Kurdî Abdullah Ocalan o û nê ercnayîşî kerd: "Manaya bêpêrodayîşî bi sîyasetbîyayîşî mumkin a. No bi demokrasî û sîyasetî mumkin o. Lazim o ke sebebanê ke çekî vetê orte wedarnê. Kordînasyon mumkin nîyo? Yê ke kordînasyon nê bikero lîderê awankerdoxî yê rêxistinî yo. Yê ke kordînasyon nê bikero Birêz Ocalan o. Nê prosesî de kede, hewldayîşê ci zaf pîl ê. Sewbîna rol, wezîfe û berpirsîyarî keweno milê kamî ser lazim o ke bica bîyarê."

 

Do kam gamî bêrê eştiş?

 

Ayşegul Dogan derheqê averşîyayîşanê ke rojê bêrê ciwîyayîş de zî vinderte û va ke meseleyê statu û heyetî de pabebîyayîşê înan est ê. Ayşegul Dogan wina nê ercnayîşî kerd: "Pabebîyayîşê ma yê verêne dimayê qanûnî heyetî ke ameyî awankerdiş xebatê înan, kordînasiyon û xerîta rayîrî dîyar kena. Bêçekbîyayîşî dir şertê xebatanê awan kerdê. Bêguman Komîsyonê Taqîbkerdişî est o. Lazim o ke ê zî xebatanê xo bi lez peynî bikerê. Semedê berjewendîye lazim o ke xebatî dem de nêrê vilakerdiş. Pêwa bêçekbîyayîşî do sîyasîbîyayîş zî hemdem bêro domnayîş. No zî pabebîyayîşê ma yo."

 

Abdullah Ocalanî dir pêvînayîş

 

Ayşegul Dogan sewbîna ard ziwan ke rojê vernî yew meseleya bînan zî akerdişê kanalê pêvînayîşî yê hetê cîyayan ke Rayberê Şarê Kurdî Abdullah Ocalan dir pêvînayîş bikerê do bêrê dîyarkerdiş û wina qedêna: "Ma sere de vanê ke lazim o ke Birêz Ocalan vengê xo yewser bi rayepêroyî bidê eşnawitiş. No waştişê ci zî yo. Rojê vernî ma wazenê ke no zî zelal bibo. Komîsyonê taqîbkerdişî yê ke meclîsî de yeno awankerdiş zî lazim o ke xebatanê xo somutî dîyar bikerê û semedo ke xebatanê xo rind bidomînê lazim o ke komîsyonêk ke têduştî nêzdîyê heme hetan bike rê bibo."