ÎZMÎR - Dayîka Aştîye Peyruze Kurt da zanayîş ke muhatabê aştîye Îmrali yo û va: “Ma wazenê muhtewayê prosesî, aştî senîn eşkeno bêro ca serekîya xo ra bieşnawê.”

 

Dayîkê Aştîye yê ke bi serran semedê aştîye têkoşîn kenê, waştişê aştîye newe ra bi hawayêko xurt anê ziwan. Dayîkê Aştîye, Komeleya Heqê Merdiman (ÎHD) de eşkerayîye dayî û dîyar kerdî ke ê wazenê Rayberê Şarê Kurdî Abdullah Ocalanî dir pêvînayîş bikerê. Yew Dayîkanê Aştîye ra Peyruze Kurt derheqê muracatî de qisey kerd.

 

‘Bi serran o ma kuçeyan de aştîye gêrênê’

 

Peyruze Kurt da zanayîş ke bi serran o semedê aştîye têkoşîn kenê û wina qal kerd: “Ma wazenê sey Dayîkê Aştîye Rayberê xo Abdullah Ocalan dir pêvînayîş bikerê. Ma wazenê serekê xo dir ronişê û qisey bikerê. Dayîkê Aştîye bi serran o kuçeyan de aştîye gêrênê. Bi serran o dej ancenê semedê tutanê xo bermêne. Cenazeyê tutanê înan yenê vindîkerdiş, bi serran o esteyê înan nînê dîyayene. Pêwa pêro nê dejan Dayîkê Aştîye semedê aştîye destê xo derg kenê. Prosesê Aştîye bi xêrê serekîye dest pêkerd. Ma wazenê serekîya xo dir pêvînayîş bikerê. Ma wazenê her çîyê ey goşdarî bikerê.”

 

‘Ma wazenê şert û mercî bêrê başkerdiş’

 

Peyruze Kurt dîyar kerd ke destpêkê prosesî ra heta nika meclîs gamêka zelal nêeşta û va, ziwanê dayîke nêame qebûlkerdiş, nasnameyê kurdî nêame nasnayene û heqê hêvîye nêame qebûlkerdiş. Peyruze Kurt wina ard ziwan: “Nê semedî ra ma wazenê newe ra muracat bikerê. Ganî rayîrê Îmraliyî bêro akerdiş, şert û mercî bêrê weşkerdiş. Ganî îmkanê resayîşê serekîye bêrê caardiş. 50 mîlyon kurdî îradeyê serekîye qebûl kenê; aştîye pawenê. Ma zî wazenê şêrê Îmraliyî. Bawerîya ma bi dewlete qels a. Ganî dewlete pey vatişê xo de bo û samîmî bo. Ziwanê şuxulnayîşî hema tehdîdkar o. Ziwanê aştîye nîyo. Kurdî hema sey terorîstî yenê dîyayene. Pêwa prosesê aştîye est o zî hema zilm û tedayî est ê. No ziwan nîno qebûlkerdiş.”

 

‘Cinîyê kurdî adetê xoverdayîşî domnenê’

 

Peyruze Kurt bale ant serê xoverdayîşê cinîyanê kurdan û sewbîna hedefgirewtişê Leyla Zana û wina dewam kerd: “Ma ewro bi çimanê xo vînenê. Çi eleqeyê Leyla Zana bi sporî est o? Leyla Zana sîyasetmedara kurde ya. Nê teda û zilmî cinîyanê kurdan ser o do heta key dewam bikero. Ma ewro meclîs de pîya nişnenê ro û qalê aştîye kenê. Ma cuya têduşte wazenê.”

 

‘Vernîya sîyasetî anêbo aştî mumkin nîya’

 

Peyruze Kurt dîyar kerd ke kurdan û ziwanê kurdkî ser o hêriş domîyeno û nê çî ard ziwan: “Kurdî semedê sîyaset kenê yenê tepiştiş, yenê surgunkerdiş. Ma ewro destê aştîye derg kenê. Ganî wayîrê nê bêro vetiş. Ganî na bawerî bêro dayîş. Ma tu dem fek waştişê xo yê aştîye ra veranêdanê. Heta berê zîndanan nêrê akerdiş aştî zî mumkin nîya.”