MERKEZÊ XEBERAN – Protestoyanê Îlamî û qezayanê ci de tewr tay 39 çalakîkerê kurdî ameyê tepiştiş û nîno zanayîş înan berdê kam ci zîndanî.

 

Protestoyanê Îran û Rojhelatê Kurdistanî roja xo ya 10ine de dewam keno. Goreyê agahîyanê ke medyaya dîjîtalî û sazgehê heqê merdiman ameyî bidestkerdiş; protestoyê 1ê Çeleyî heta 4ê Çeleyî de Îlamî û qezayanê ci tewr tay 39 kurdê sivîlî ameyî tepiştiş û înan berdê cayanê nêdîyaran.

 

Hêzê rejîmê Îranî bi taybetî bajarê Îlamî û qezayanê ci yê sey; Dareh, Dehloran, Badreh, Chradoul, Sarableh û Abdananî çalakîkeran destbend kerdê û tepiştê.

 

Ame dîyarkerdiş ke mîyanê nê tepişteyan de zaf tutê ke emrê înan binê 18 serrî de zî est ê. No zî derheqê heqê tutan de binpaykerdişê cidî yê qanûnanê mîyanneteweyî rafîneno verê çiman.

 

Aktîvîst û sazgehê heqê merdiman ê mîyanneteweyî semedê nêdîyarîyê rewşa tepişteyan bi endîşeyîn ê û venga rejîmê Îranî kenê ke lez tutî û şexsê sivîl veradê û derheqê înan de agahîyê zelal bidê. Dadgehanê rejîmê Îranî ra zî yeno waştiş ke edaletê xo goreyê mîqyasê qanûnanê heqê merdiman bikerê.