MERKEZÊ XEBERAN- Cinîyê Nisêbînî vera kiştişê wayanê bi nameyê Sumeyye Khaled Abîra û Suheyla Ozdaş reaksîyon mojna û Hemşaredar Gulbîn Şahîn Daghan vat ke kiştişê cinîyan sîstematîk o û kiştoxî yenê pawitene.

 

Qezaya Nisêbînî ya Mardînî de 4ê çeleyî de hetê kesê bi nameyê Muhyedîn Baglanî ra wayê bi nameyê Sumeyye Khaled Abîra û Suheyla Ozdaş ameybî kiştene. Cinîyê Nisêbînî ewro xo amade kerd ke cenazeyê her di wayan ewro bigîrê û bierşawê şaristanê Dêrikî yê Rojavayê Kurdîstanî.

 

‘Bi zanayîş bi şewe cenazeyî dîyayî’

 

Hemşaredara Mardînî ya Şaristanê Girdî Devrîm Demîr, Hemşaredara Nîsêbînî Gulbîn Şahîn Daghan û gelekî cinî ke şîyê berê Morgê Nêweşxaneyê Dewlete yê Nisêbînî dî ke cenaza abîş hetê rayedaranê dewlete ra ameya girewtene û Berê Sînor ê Xabûrî ra erşawita başûrê Kurdîstanî.

 

Nê kerdişî ser o rayedaranê dewlete girseyê cinîyan vernîya Nêweşxaneyê Dewlete yê Mardînî de eşkerayî daye. Hemşaredara Nîsêbînî Gulbîn Şahîn Daghan dîyar kerd ke no di rojî yo bi kiştişê her di wayan gelekî xemgîn ê û wina qisey kerd: “No di rojî yo di cinîyê wayê yewbînan hetê camêrdêkî ra ameyê kiştene. Ma her demî cenaza taqîb kerdêne û ma keyeyî reyde zî mîyanê dayîşûgirewtişî de bîyê. Dimayê karê otopsîyî ma do ewro cenaza bierşawitêne Rojavayê Kurdîstanî. Demo ke serê sibayî ma ameyê nêweşxane ma dî ke abîş polîsan bi hewayêko nimitw cenaza erşawita başûrê Kurdîstanî. Rayedarê le vernîya kiştişê her di wayan nêgirewt, nika zî cenazayan remnenê. Sey cinîyanê Nisêbînî ma vat ma do wayîrê cenazayan vejîyê. La wayîrvejîyayîşî ra tersenê, zîhnîyeto ke cinîyan kişeno û zîhnîyeto ke cenaze remnayê eyn zîhnîyet o.”

 

Eşkerayî bi sloganê, “Jin Jîyan Azadî” qedîya.