AMED - Tewrê varayîşê vewre û hewayo serdin zî xebata seba beşdarîyê mitîngê “Hêvî û Azadîye” Amed de dewam kenê. Erxenî de binê vewre de vengdayîşê beşdarîya mitîngî ame kerdene.

 

Platformê Sazgehanê Demokratîk do 4ê çeleyê 2026î de Qadê Îstasyonî ya Amedî bi waştişê azadîya fîzîkî ya Rayberê Şarê Kurdî Abdullah Ocalanî, mitîngê “Hêvî û Azadîye” organîze bikerê. Mitîng do saete 13:00î de bêro kerdene. Do mitîngî de Veysî Aktaş, Çetîn Arkaş, Hemsereka Pêroyî ya DBP’yî Çîgdem Kiliçgun Uçar, Hemserekê Pêroyî yê DEM Partîyî Tuncer Bakirhan, aktîvîsta Têgêrayîşê Cînîyanê Azad (TJA) Ayla Akat Ata û sîyasetmedara kurd Leyla Zana qisey bikerê.

 

Vengdayîşê beşdarîyê mitîngî

 

Merkezê Amed û qezayanê ci de tewrê varayîşê vewre û hewayo serdin zî xebata seba mîtîngî dewam kena. Hemşaredarê Erxenî Şîyar Guldîken û rayberê DEM Partî û DBP’yî yê qezayî tewrê varayîşê vewre zî dikandar, qehwexane û bazarê heywanan de gêrayê û şarî dawetê mîtîngî kerd.