MERKEZÊ XEBERAN - Koordînasyonê Kongra Star hêrişê cîhadîstan ê HTŞ’yî hemverê rayîrşîyayîşê qeraxê Sûrîye şermezar kerd û dîyar kerd ke ganî her kes hemverê nê hêrişan de vindero.

 

Vizêrî hêzê cîhadîstan yê Heyet Tehrîr el-Şamî hêrişê rayîrşîyayîşê şarê elewî yê qeraxî kerd û netîceya hêrişî de bi desan merdimî birîndar bîyî û ameyî qetilkerdiş. Goreyê agahîyan, hêrişan de kardî û şimşirî ameyî şuxulnayene, sewbîna hewl ame dayîş ke bi wesayîtan merdiman birevênê û gazê rondikrêj ame şuxulnayene. Bertekê hemverê nê hêrişa vahşî zêde benê. Koordînasyonê Kongra Star bi eşkerayîyêko hêrişê cîhadîstan ê HTŞî hemverê rayîrşîyayîşê qeraxî şermezar kerd.

 

Eşkerayî de nê çîyî ameyî vatene:

 

“Sey yeno zanayenîş bingehê waştişê federalîzmî û xoîdarekerdişî Lazkiye, Tarsus, Ceble û Humusî de şarê elewî rayîrşîyayîşê aştîyane viraştî. Bi hezaran merdimî tewrê rayîrşîyayîşan bîyî û mîyanê nê rayîrşîyayîşan de cinîyan rolêko gird kay kerdî. Labelê çi heyf newe ra hetê cîhadîstan ê hukmatê demkî ra rî bi rî yê hêrişê wehşî ameyî. Netîce de zî bi desine merdimî ameyî qetilkerdiş, bi seyan merdimî ameyî tepiştiş, birîndarkerdiş û îşkencekerdiş.

 

Vernîya pêro çîyan ma kesê ke na çalakîya heqî de ameyî qetilkerdiş bi hurmet yad kenê û semedê keyeyê înan û şarê elewî sersaxî wazenê. Semedê birîndaran şîfaya lezgîn wazenê. Bi taybetî cinîyê ke rayîrşîyayîşan de ca girewtî, serkêşîye kerdî yê ke ameyî qetilkerdiş ma yad kenê û ma vanê ke ma do têkoşînê înan bidomnê. Ancî cinîyê ke birîndar bîyê ma hêvî kenê ke demêko nêzdî de biresê weşîya xo.

 

Heto bîn ra, ma semedê pêro raya pêroyî vanê ke wa hemverê nê hêrişanê wehşî de bêveng nêmanê. Her kesê ke semedê merdimîye, semedê heqê şaran, semedê demokrasîy têkoşîn kenê ganî veng vejê. Ancî wa her kes bizano ke ê ke nê rayîrşîyayîşan de serkêşîye kerdî cinî bîyî û netîce de zî zaf cinî ameyî qetilkerdiş û tepiştiş. Teberê nê zî rojane cinîyê elewî, durzî, xrîstiyanî bi caardişê wehşî yê cîhadîstan dir rî bi rî yenê. Hemverê nê caardişan ma pêro rêxistinê cinîyan yê ke hemverê nê caardişan vindenê vanê wa hêzê xo yew bikerê, bi yew vengî semedê cinîyanê elewî, semedê şarê elewî veng vejê. Ancî ma bi taybetî venga cinîyanê elewî yê pêro dinya kenê ke wa piştîdayîşê xo semedê şarê elewî bimojnê. Ma do bi têkoşînê pêroyî hemverê caardişê cîhadîstan bi ser bikewê.”