RIHA - Komxebata ke hetê Têgêrayîşê Cinîyan ê Azadan (TJA) ra ameye organîzekerdiş de, ame qetîkerdiş ke çareyê şîdetê komelkî ganî mîyanê komelî de bêro çareserkerdiş.

 

Çarçewaya Roja Mîyanneteweyî ya Werte ra Wedaritişê Şîdetê Cinîyan Ser de, Têgêrayîşê Cinîyan ê Azadan (TJA) bi şîarê “Bi komelê demokratîk ver bi azadîya bêşîdetî” xeylê bajaranê Kurdistan û Tirkîya de çalakîyê xo domneno û komxebatî yenê viraştiş.

 

TJA, dewa Helbinî ya qezaya Xelfetî ya Riha de komxebatêka cinsî ser viraşt. Hemşaredarê Şaredarîya Xelfetî, Parlamentera Riha Dilan Kunt Ayan û xeylê kesê bînî beşdarê komxebate bîy. Kesê ke beşdar bî dîyar kerdî ke bêtêduştîya mîyanê cinî û camêrdan de problemêko kûr o.

 

Dilan Kunt Ayan qisey kerd û dîyar kerd ke şîdet her roj tewr kûr beno û va: “Sey cinî û camêrdê ke nê komelî de ciwîyenê, ma parçeyê nê şîdetî yê. Ma semedê rolanê ke hetê sîstemî ra ma ser ferz bîyê resayê na merhela. Ma prosesêko zaf krîtîk û muhîm ra derbas benê. Ma prosesê aştî û komelê demokratîk ra derbas benê. Ma qalê prosesêko wina kenê ke bi dayîşûgirewtiş bêro çareserkerdiş ke merg, vînîkerdiş û dej seserrêke nê erdan ser o bîyo. Nê prosesê tarîxî de rastîyêka bi nameyê şîdetî est o. Ma hedîseyê tersî ê ke merdim komelî de her roje vînenê. Ma eşkenê bivînê ke şîdetê tutan ser Bozova de çi merhela rê resayo. Ma vînenê ke şîdet çiqas xof o. Ma vînenê ke tûtêke senî dewêke de ameye kiştiş, sey dewaya Narîn Gurane. Nîno qebulkerdiş ke na herême de beno. Ganî ma problemê bingehînan ê ke benê sebebê nê şîdetî û nuqteya ke sîstemê înan ardo ci ser munaqeşe bikerê.”

 

Dimayê Dilan Kunt Ayane, hemşaredara Xelfetî Saniye Bayram zî têkoşînê xo ya semedê cuya azad ard ziwan. Peynî de zî problemê cinî û camêrdê ke beşdarê komxebate bîy qisey kerd.