Oznur Deger

 

WAN – Verfeka PÎA’yî Menîce Rumeysa Gulmez derheqê prosesê “Aştî û Komelê Demokratîk” de qisey kerd û va, ma hetê aştîye de yê û wina ard ziwan: “Ganî ciwanê ma nêmirê, ganî cografyayêke merdim bieşko ci de biciwîyo bibo. Semedo ke no baş bidomyo, ganî waştişê kurdan bica bêro. Ganî kurdî bibo ziwanê perwerdeyî, bi hawayêko fermî bêro naskerdiş û tepişteyê sîyasî bêrê veradayîş.”

 

Prosesê “Aştî û Komelê Demokratîk” ke bi vengdayîşê Rayberê Şarê Kurdî Abdullah Ocalanî yê 27ê Sibate de ame kerdiş, nika aşme bi aşme pey xo de verda. Nê prosesî de Têgêrayîşê Azadîya Kurdî çeke veşnayî, hêzê xo Vakurê Kurdistanî ra peyser ant. Nika çimî hemê raporê Komîsyono ke Meclîs de ameyo awankerdiş û gamê dewlete ser o yo.

 

Verfeka Partîya Merdim û Azadîye (PÎA) Menîce Rumeysa Gulmez derheqê prosesî de qisey kerd.

 

Menîce Rumeysa Gulmez da zanayîş ke proses netîceya têkoşînê 40 serran o û wina va: “Dimayê vengdayîşê Abdullah Ocalanî proses kewt merheleyêka newe. Semedo ke proses bi sîyasetêko demokratîk bêro domnayîş vengdayîş kerd. Kurdî na rewşe ra zaf keyfweş ê. Kurdan tu rey şer û pêrodayîş nêwaştî. Her tim aştî waştî. Cuya demokratîk û têhet waştî. Labelê şer û pêrodayîş hetê hukmatê tirkî ra esas ame girewtiş. Labelê nika na merhela ke Rojhelato Mîyanên kewt ci de ganî hîn zaf şertî bivurnê. Tirkîya zî mecburî nê kerd. Na babete de meseleya kurdî zêde muhîm bî. Tirkîya nê ser de hîn game eşt.”

 

‘Abdullah Ocalan aktorê tewr gird ê prosesî yo’

 

Menîce Rumeysa Gulmez dîyar kerd ke gama yewine ya prosesî vengdayîşê Abdullah Ocalanî bî û wina domna: “Abdullah Ocalan aktorê tewr gird ê prosesî yo. Devlet Bahçelî destê xo dergê DEM Partî rê kerd û silam da. Nê prosesî de hetê kurdan ra gamê muhîmî ameyî eştiş. Çîyo tewr gird ke çekan veşnayî û gamêka tarîxî eştî. Na pîlêr game çin a. Labelê pêwa nê hema dewlete gamêka somut nêeşta.”

 

‘Ganî heme partîyê sîyasî wezîfeyê xo bîyarê ca’

 

Menîce Rumeysa Gulmez dîyar kerd ke proses tena problemê DEM Partî, AKP, MHP nîyo, problemê heme komelî yo û wina domna: “Problemê kurdî heme hetan eleqedar keno. Heme partîyê kurdan eleqedar keno. Ganî heme rêxistinî beşdarê prosesî bibê. No problemêk gerdunî yo. Ganî heme partî wezîfeyê xo bîyarê ca. Ma sey PÎA her tim hetê aştîye de bî. Ma piştîdayîş danê prosesê ‘Aştî û Komelê Demokratîkî’.”