Buşra Turan

 

WAN – Cinîyan Merkezê Cuye û Piştîdayîşê Cinîyan ê Şamîranî ke hetê qeyûmî ra amebî girewtiş, newe ra akerd. Cinîyan derheqê babete de va: “Pêwa zîhnîyetê qeyûmî, ma do yew bi yew berê cayanê cuya azad ê ke ameyî girewtiş akerê.”

 

Merkezê Cuye û Piştîdayîşê Cinîyan ê Şamîranî ke bi hemkarîya Şaredarîya Bajarê Girdî ya Wanî û Şaredarîya Artemêtî xebata xo domneno, hetê qeyûmî ra amebî girewtiş. Merkezo ke qeyûmî girewtbi, cinîyan çarçewaya 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî de bi şayîyêke 16ê teşrîna peyêne de newe ra akerd.

 

Cinîyê beşdarê akerdişê Şamîranî bîyî, derheqê muhîmîya merkezî de qisey kerdî.

 

‘Merkezê cuya cinîyan bi keda xo eşkenê bibê hemkar’

 

Hemşaredara Artemêtî Rabîa Başak Koç da zanayîş ke polîtîkayê qeyûmî cuya cinîyan hedef gênê û wina va: “Ma vengê xo berz kenê û wareyê cuya cinîyan gird kenê. Merkezê Cuye û Piştîdayîşê Cinîyan ê Şamîranî do bibo merkezê cuya cinîyan ke bi kede û fikrê xo benê hemkar. Pêwa zîhnîyetê qeyûmî ke berê cayê cuya azad girewtê, ma do bi hawayêkê xurt wareyê cinîyan yew bi yew akerê. Hêzê cinîyan ra tersenê. Semedê nê hêrişê destkewtişê cinîyan kenê. Cinî do hemverê girewtişan hîna xurt wareyê xo akerê. Ma zaf xurt ê û moralê ma berz o. Ma semedê wareyê xo têkoşîn kenê.”

 

‘Cinîyan nêeşkenê çin bikerê’

 

Endama Meclîsê Şaredarîya Artemêtî Guneş Ovmen zî destnîşan kerd ke girewtişê merkezî hêrişêk hemverê wareyê cuya têhet û piştîdayîşê cinîyan o û wina va: “Pêwa heme mudaxeleyan ma xebatanê xo domnenê. Ma merkezê cuya cinîyan bi hemkarîya şaredarîya girde akerd. Qeyûman dir wareyê cuya cinîyan hedef ameyî girewtiş. Labelê ma sere nêtewêna. Zîhnîyetê qeyûmî pêwa heme zordarî û hêrişê xo cinîyan nêeşkenê çin bikerê. Semedo ke her rey ê gênê ma newe ra akenê. Ma tîya de yê û têkoşîn kenê.”

 

‘Cinî serkêşê komelî yê’

 

Hemşaredara Şaredarîya Bajarekê Girdî ya Wanî Leyla Çelîk zî dîyar kerd ke Merkezê Cuye û Piştîdayîşê Cinîyan ê Şamîranî dimayê xespkerdişê qeyûmî newe ra ameyo akerdiş û wina va: “Merkez semedê xurtkerdişê wareyê cuya cinîyan muhîm o. Ma Merkezê Cuye ya Cinîyan ê Şamîranî taxa Suphan de akerdbî. Labelê dimayê hêrişê qeyûman ma newe ra taxa Şabaniye akerd. Semedo ke cinî mîyanê çar dêsan de nêbê, semedo ke ma bîyarê vîr ke cinî planê dîyine de nîyê, ma tîya de yê. Cinî her tim planê peyêne de ca girewtî. Ma semedê nê têkoşînê xo bidomnê. Cinî tu rey tena nîyê. Hêzê serkêş ê komelî yê. Ma do têkoşînê xo bidomnê.”

 

‘Ma sere nêtewênenê’

 

Hemsereka DEM Partî ya Artemêtî Sevîm Baş bale ante muhîmîya merkezê Şamîranî ser û va tena awanîyêke nîya, semedê cinîyan wareyêk gird a ke maneya perwerde û berardişî est a. Sevîm Baş wina qedêna: “Nê hetî de cinî bi şans ê. Cinî do tîya de hetê perwerde, musayîş û cuya azad de destpêkê weşî bikerê. Merkez, keyeyê cinîyan o. Pêwa qeyûmî merkez girewtbî, ma newe ra akerd. Ma do merkezanê xo akerê. Ma fek ci ra veranêdanê. Ma sere nêtewênenê.”