WAN - Goreyê raporê zêde yê ATK’î derheqê Rojîn Kabaîşe de qetî bî ke 2 DNA’yê ke bedenê aye ser de bîyê, tebera nêbîyê. Ame zanayîş ke tîya ra tepîya do dozgerî derheqê kesê şikdaran de ercnayîşê xo bikero û DNAyan bîyaro têhet.

 

Merdişê bi guman ê wendekara Zanîngeha Yuzuncu Yilî ya Wanî Rojîn Kabaîşe de heta nika zî nêame roşnkerdiş. Persê derheqê DNAyê di camêrdan ê raporê Sazgehê Tibê Edlî (ATK) de ameybî tespîtkerdiş hema nêameyê cewabkerdiş. Ame zanayîş ke raporê zêde yê baroyanê Amed û Wanî, avûkatanê keyeyê Rojîn Kabaîşe û Wezaretê Edaletî ATKî ra waştibî zî dosya de ame zêdekerdiş.

 

Goreyê xebera Ajansê Mezopotamyayî; raporo zêde ke çend rojî verê ameybî şawitiş û rapor de qetî bîyo ke 2 DNAyê bedenê Rojîn Kabaîşe ameyê tespîtkerdiş, teber ra nîyê.

 

ATKî raporê xo yê verê de vatêne ke îhtîmalê teber ra  yo la raporê newî de dîyar bî ke DNAyê kesê ke tewrê otopsîyî bîyê, wextê vînayîşê cenaze de uca de bîyê, wextê berdişê cenaze de ca girewtê û kesê Rojîn Kabaîşe dir têkilî dayê ro (hevalê aye yê zanîngehe û hevalê aye yê bînî) zî mîyan de bi pêroyî 134 kesan ameyê girewtiş. ATKî, ard ziwan ke nê nimûneyan dayê têhet û vejîyayo werte ke tu yew nê DNAyan û yê bedenê Rojîn Kabaîşe ser o ameyê vînayîş, yewbînan nêgirewtê. Nê dir qetî bî ke 2 DNAyê bedenê Rojîn Kabaîşe ser o ameyê vînayîş teber ra nêgirewtê.

 

Ameya zanayîş ke dimayê raporî, dozgerî do ercnayîşê xo goreyê kesê gumanan ci ra beno, bikero û DNAyan bîyaro têhet. Babeta tewr zêde endîşeyîne a ya ke dosya bêro tarîkerdiş. Hûqûqnasî vanê ke semedê roşnkerdişê dosyaye beno ke yew dayeyê tewr muhîm, agahîyê telefonê Rojîne de bê.