MERKEZÊ XEBERAN - Înîsîyatîfa Yewîya Demokratîk ke serrgêra Qirkerdişê Sînemaya Amûdê de qirkerdiş bi eşkerayîyêke şermezar kerd, wina va: “Ma do tu wext Qirkerdişê Sînemaya Amûdê xo vîr ra nêkerê û nêdê xovîrrakerdiş.”

 

13ê teşrîna peyêne ya 1960ine de qezaya Amûdê ya bajarê Qamişlo yê Rojawanê Kurdistanî de 283 tutê kurdî Sînemaya Amûdê de ameyî veşnayîş. Sînemaya Amûdê ke kapasîteyê aye 120 merdimî bî, xeylê xo kurdî bi pêroyî 500 kesî uca de bî. Sînema de fîlmê Cerîmet Nisif el-Leyl (Sûcê nîmşewe) ameyêne mojnayîş. Reyke de adir bi perdeyan kewt û wextêk kilm de heme eywane rê vila bî. Eywana sînemaye 130 metrekare bî û her di berê aye zî ameybî girewtiş. Eywana sînemaye wextêk kilm de rijîya. Emrê înan mabêne 8 û 14ine de bi pêroyî 283 tutî dinyaya xo bedelnayî. Nê qirkerdişî ser o 65 serrî derbas bî.

 

Yewîya Înîsiyatîfê Demokratîk, serrgêra qirkerdişê Sînemaya Amûdê de bi eşkerayîyêk nuşteyî qirkerdiş şermezar kerd.

 

Înîsiyatîfê Yewîya Demokratîk, eşkerayîya xo ya bi sernameyê “Ma do Qirkerdişê Sînemaya Amûdê Xo Vîr ra Nêkerê” pare kerd de wina va: “Yew qirkerdişê ke şarê kurdî ser o ame kerdiş zî bêguman qirkerdişê Sînemaya Amûdê yo. Her çiqas ser ra 65 serrî zî derbas bîyo zî, Amûdê hema zerrîveşnaye yo, dej û azarê merdimê Amûdê de dewam o. Semedê nê 13ê teşrîna peyêne yê 1960ine de bi tavistişê adirî yê bi hawayêkê plankerde yê Sînemaya Şehrazadî, tarîxê Kurdistanî de trajedîyêkê bêhempa ame zêdekerdiş. Amûdê de 283 tutê kurdî ke emrê înan mabêne 8 û 14 serre de bî semedê nê şewatî dinyaya xo bedelnayî.

 

Înîsiyatîfê Yewîya Demokratîkî, dîyar kerd ke Amûdê de bi seyan tutî bi hawayêkê bizanebîyayîş ameyî qetilkerdiş û wina domna: “Semedê nê selahîyetdarê rejîmê Baasî yê ê wextî, kapasîteyê sînemaya ke 200 merdimî bî 500 tutê dibistana sereyîne bi mecbûrî berd salona sînemaye. Wextê ke adir bi sînema kewt, berê salone hetê leşkeran ra tutan ser o ameyî padayîş û nêverdayî adir bêro tefênayîş û tutî xo şewat ra bixelisnê. Semedê nê tu guman çin o ke qirkerdişê sînemaya Amûdê, hetê rejîmê Baasî ra çarçeweya dişminîya şarê kurdî de bi hawayêkê organîze ame kerdiş.

 

Înîsiyatîfê Yewîtiya Demokratîk eşkerayîya xo bi nê qiseykerdişan peynî kerd: “Ma do tu wext Qirkerdişê Sînemaya Amûdê xo vîr ra nêkerê û nêdê xovîrrakerdiş. 65ine serrgêra nê qirkerdişî de ma heme tutê ke bi hawayêkê hovane ameyê qetilkerdiş bi rêzdarî û xemgînî yad kenê; hîsê xo yê piştdayîşî keyeyê Amûdê dir pare kenê.”