Gulistan Gulmuş

 

RIHA - G.Ç ya ke semedê hêrişê DAIŞî koç kerd, waşt ke şer û qirkerdişî biqedîyê û va: “Cinî çin bê cuye çin a.”

 

Bi hezaran cinîyê ke semedê hêrişê DAIŞî koçê bajarê Kurdistan û Tirkîya kerdî, nika hema birînê koçberî û şîdetê komelî hîs kenê. Şert û mercê bêasayîşî de ciwîyenê û her tewirê şîdetî dir rî bi rî yenê. Cinîyê koçberî hem semedê nasnameyê kurdî, hem yê cinî hem zî mîyanê feqîrîyî de zordarî û zehmetîyan ancenê.

 

Bi wesîleya 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî ma têkoşînê cuya G.Ç ya ke Kobanê ra koçê Hewagî ya Rihayî kerda, pare kenê.

 

 

‘Ma vatêne qey DAIŞ hema pey ma de yo’

 

G.Ç hîkayeya koçberkerdişê xo qal kerd û ard ziwan ke zaf zordarî û zehmetî antê. G.Ç wina domna: “DAIŞ ma ser de ameyêne. Ma zî vatêne bêrê do se bikerê. Wextê ameyî, ma remayî, ma ameyî tîya. Wextê ma ameyî ma kes nas nêkerdêne. Ma ameyî na dewe. Ma erdê pemî ser o xebityayî. Wayîrê erdî baş bi. La hema zî ma tersenê, ma vênê qey DAIŞ pey ma de yo. Ma xebate kerd û dima ra ma keyeyêk kira kerd.”

 

‘Cenazeya kênaya mi şawitî Kobanê’

 

G.Ç wina dewam kerd: “Ma problemê ekonomî ciwîyayî. Nivînî çin bîyî. Psîkolojîya kênaya mi xira bî. Vatêne no ca weş nîyo ma şêrê. Ma vatêne her kes ameyo tîya. Dima ra nêweş kewte. Ma berd her cayî. Ma derman kerd. Sibayêk va lingê mi dejenê. Ma berd nêweşxane uca de dinyaya xo bedelnaye. Cenazeyê kênaya mi vera ke kes ci dir bo şawitî Kobanê. Destûr nêdayî ma şêrê. Ma berd berê sînorî. Ez zaf bermaya. Werrekna ez bibayîne wa kênaya mi nêbîne.”

 

‘Wa qetilkerdişê cinîyan biqedîyo’

 

G.Ç bale ante şîdetê cinîyan ser û na babete de zî wina va: “Ma cinî xo bêasayîş hîs kenê. Ganî cinî azad bê. Cuyêka azad biciwîyê. Mi zaf zor, zehmetî, feqîrî ant. Tu kesê ma çin bî. Hîna zî ez tersena ez vana qey do DAIŞ bêro. Bêguman ma bêrîya erdê xo kenê. Ma aştî wazenê. Wa êdî cinî zehmetîyan nêancê. Ma cuyêka azad wazenê. Cinî cuye ya. Cuye milê cinîyan ser o domyena. Cinî çin bê cuye çin a. Wa qetilkerdişê cinîyan biqedîyo.”