AMED - Sevda Arcana ke 14 serrî dima zîndan ra vejîya û bale ant serê şert û mercê giranî yên tepişteyê cinî û va, hewcedariyê esasî nînê dayîş, problemê weşîye nêvînaye yenê.

 

Dadgeha Desturê Bingehîn (DDB) cezaya bi îdiayê ‘pêwa endama rêxistine nîya û nameyê rêxistine ser o sûc kerda’ ameya dayîş, hemverê desturê bingehîn dî û betal kerd. Nê ser de Sevda Arcana ke zîndanê Cinîyan ê Erzînganî de bî, dimayê 14 serran amî veradayîş. Sevda Arcan ke 17ê sibata 2011ine ra heta nika tepişte bî û 17 serrî ceza ci rê amebî birnayîş, 25ê temmuze de bi qerarê dadgehe amî veradayîş.

 

‘Ma sere nêtewêna’

 

Sevda Arcan wina va: “Pêwa pêro hewldayîşê ma gamêke pozîtîf nêameyîne eştiş. Nêweşxaneyan de problemê kelepçe estbî. Doktor kelepçe anêkerdêne. Eke fermandar bivatêne abike, do abikerdêne. Ma bi kelepçeyan rîngan rê espar kerdêne. Rîngî xeylêk xirab bî. Ma nêeşkayîne boya xo bigîrê. Ma bi îşkence şîne û ameyîne. 4-5 koxuşan de tewr tay 80 tepişte estbî. Koxuşî pirr bî.”

 

Caardişê bêmerdimayî

 

Sevda Arcan bale ant problemê bînan ser û va: “Tuwalet û banyo yew bî. Ma cuya xo wina dewam kerdêne. Ma problem neql kerdêne la çareserîyêk çinbî. Bêagahî her tim koxuşê ma ameyîne vurnayîş. Ma 8 kesî dayî odayêk. Xoresnayîşê pedê hîjyenîk zaf zehmet bî. Ma ranzayêk de di kesî kewtêne ra. Çar koxuşî estbî. Her yewî cayêk cîya bî. Mumkin nêbî ma bêrê têhet. Prosesê çareserîya 2025ine ê bînan ra cîyayêr o. No proses kelecanêk bi ma da awankerdiş. Ma dejê pîlî ciwîyayî. Waştişê ma oyo ke her di hetî zî nêmirê.”

 

‘Bê serekî çîyêk nîno çareserkerdiş’

 

Sevda Arcan bale ant felsefeya Raberê Şarê Kurdî Abdullah Ocalanî ser o û va ke na felsefe tena Tirkîya nê, pêro dinya vila bîyo û va, bê Abdullah Ocalanî çîyêk nêeşkeno bêro çareserkerdiş. Sevda Arcan derheqê sererastkerdişê qanûnî de zî qisey kerd û va: “Demo ke ma eşnawit ma bi hêvî bî. Xeylêk tepişteyê nêweşî est ê. Hevalê ke problemê giranî ciwîyenê est ê. La çîyo ke ganî pakêta hukmî de biameyîne kerdiş, nêame kerdiş. Zîndanan de edalet nê, poşmanî yena ferzkerdiş. Ma nê qebûl nêkenê.”