WAN - 23yê tebaxe de Wan de bi serkêşîya TJA, DEM Partî û DBP’yî bi sloganê “Tecrîd nê, azadî do bi ser kewo” mitîng bêro organîzekerdiş. 

 

23yê tebaxe de do Wan de bi serkêşîya Têgêrayîşê Cinîyanê Azadan (TJA), Partîya Herêmanê Demokratîke (DBP) û Partîya Têduştî û Demokrasî (DEM Partî) û bi sloganê “Tecrîd nê, azadî do bi ser kewo” mitîng bêro organîzekerdiş. Derheqê mitîngî de awanîya DEM Partîye ya bajarî de eşkerayî amî dayîş. Xeylêk temsîlkarê rêxistinê komelê sivîlî zî beşdar bî. 

 

Kurmancîya eşkerayîye hetê Hemserekê DBP’yî Artemêtanî Mazlum Babur û tirkîya ci zî Hemsereka DEM Partîye ya Rêya Armûşî Şevîn Polat wende. 

 

‘Abdullah Ocalan çîyo ke kewt milê ey ser kerd'

  

Hemsereka DBP’yî Wanî Gonul Uzunay va ke meseleya kurdî bi polîtîkayê înkar û îmha dewam kena û no problem sey nêweşîyêk Kurdistan û Tirkîya vila benê. Hemserekê DEM Partîye yê Wanî Veysî Dîlekçî zî va ke lazimîya şarê Rojhelatê Mîyanên û Tirkîya bi aştî est a, her xebata semedê aştîye semedê înan pîroz a û va ke babeta çareserîya problemê komelî de Rêyberê Şarê Kurdî Abdullah Ocalanî berpirsyarîyê xo bica ardo. 

 

Hemşaredarê Bajarê Pîlî yê Wanî Abdullah Zeydan zî vengdayîşê wayîrvejîyayîşê prosesî kerd û semedê mitîngî veng da.