MERKEZÊ XEBERAN - Çarçewaya kampanyaya “Vatişê ma nêqedîya, ma do şîdet pîya vindarnê!” ke bi hemkarîya şaredarîyê Amed û sazgehê cinîyan dest pêkerd, Mudirîya Polîtîkayê Cinîyan ê Şaredarîya Peyasî, Parka Ormanî de çalakîyêke organîze kerd. Armancê çalakîye, balantişê zêdebîyayîşê kiştişê cinîyan û agahdarkerdişê cinîyan derheqê heqê înan de bî.

 

Bi serkêşîya Mudirîya Polîtîkayê Cinîyan, çalakîkerê cinî Parka Ormanî de standêk akerdî û vilawikê kampanyaye vila kerdî. Sewbîna, bi sînevîzyon agahiyê derheqê merkezê destekdayîşê cinîyan û sazgehê pêwendîdar ameyî mojnayîş. Çalakîkerî cinîyan dir rî bi rî pêvînayîş kerdî û rayîrê muracatî yê rewşa şîdetî de înan dir pare kerdî. Netîceya xebatê agahdarkerdişî de, hîrê cinîyê ke rastê şîdetî ameyê, muracatî ameyî girewtiş.

 

Sozê Têkoşînê xurtî

 

Hemşaredara Peyasî Bêrîvan Gulşen Sîncar dimayê çalakî eşkerayî da û va ke kampanya bi qerdarî dewam kena. Gulşen Sîncar wina va: “Ma wazenê mekanîzmayê muracatê cinîyan tewr bi bandor bikerê û her tim verê cinîyan de bê. Lazim o ma pîya hemverê şîdetî de helwestêk xurt û zelal bimojnê.”

 

Gulşen Sîncare qetî kerd ke ê do bi îdareyê herêmî û torê cinîyan dir têkoşînê hemverê şîdetê cinîyan tewr bi hêz dewam bikerê.