Rozerîn Gultekîn

 

MÛŞ - Li Gimgimê, welatiyên ku li dijî projeya JES’ê ya ku dê bandoreke neyînî li 16 gundan bike li ber xwe didin gotin: "Em ê li dijî talankirin û qirkirina xwezayê li ber xwe bidin û em ê bi hev re welatê xwe biparêzin."

 

Walîtiya Mûşê, projeya Santrala Enerjiya Jeotermalê (JES) ku wê ji aliyê Şîrketa Hilberîna Enerjiyê ya IGNIS H2 a navenda wê li Amerîkayê ye, li gundê Xwarik ê navçeya Gumgim a Mûşê bê çêkirin, pesend kir. Şîrket hewl dide di meha Gulanê de dest bi sondaja ewil bike. Ligel vê, bertekên li dijî vê projeya ku dê bandoreke neyînî li 16 gundên Kurdên Elewî bike, didomin. 

 

Alev Yilmaz ji gundê Onpinar a Gimgimê dijî û bi sewalkariyê debara xwe dike û wiha ji ajansa me re axivî: "5 sal beriya niha ez li Stenbolê bûm û min berê xwe da gund. Pirsgirêka ku îro em dijîn ne tenê ya li vir e. Niha bû pirsgirêka welat. Li herêma Egeyê, Deryaya Spî û Deryaya Reş, Rojhilata Anatolyayê pirsgirêk mezin dibe. Em ê ji bo her parçeyê têkoşîna xwe bidomînin. Dê xwezaya me, gundê me talan bikin û enerjiya ku li vir derdikeve dê bişînin welatek din. Em ê li vir têk biçin lê welatên din dê bi vê enerjiyê bijîn. Em rê nadin IGNIS'ê û IGNIS’ê. Em ê heta dawiyê ji bo azadiya xwezaya xwe û bi dawîkirina projeyê têkoşîna xwe bidomînin."

 

'Ev çiya, kevir, av û daristan ên me ne'

 

Alev Yilmaz wiha bal kişand ser xebatên xwe: "Keyayê gundê me, ji vê projeyê me agahdar kir. Me tavilê komeke WhatsApp ava kir û bi awayekî rêxistinkirî berdewam kir. Wekî Platforma Ekolojiyê ya Gimgimê, me civînên gund û civînên giştî jî li dar xistin. Vartoyê rojev çêkir. Em li vir bi ser ketin û têkoşîna me ya li dijî şîrketê dê bi qîrîna serketinê bi dawî bibe. Ev erd, ev erdnîgarî, ev Herêma Serhadê ya me ye û niyeta me tune ku em wê bidin kesî. Divê her kes hişê xwe bîne ser xwe. Varto ne hedefeke hêsan e. Kes nikare Vartoyê bîne ser çokan. Em ê tu carî ji vê têkoşînê paşve gav neavêjin. Parêzerên me jî pêvajoya qanûnî dane destpêkirin. Em daxuyaniyên hatine dayîn samîmî nabînin heya ku daxuyaniyek fermî neyê dayîn. Em ê ji bo daran, çûkan, jinan û zarokan li ber xwe bidin. Varto gelekî ye ku bi axa xwe re yekbûyî ye û bi wê re di aştiyê de ye. Em bi vî rengî mezin bûn, em bi vî rengî mezin bûn. Bav û dayikên me ev şêwazê jiyanê fêrî me kirin. Wekî gel, em ê tu carî ji têkoşîna xwe paşve gav neavêjin. Em bi hezaran salan li ser van axan in û em ê bi hezaran salên din têkoşîna xwe ya hebûnê bidomînin û em ê hebûna xwe bidomînin. Ev çiya, kevir, av û daristan ên me ne. Em ji kesî natirsin."

 

Di demekê de ku pêvajoya Aştî û Civaka Demokratîk berdewam dike, Alev Yilmaz, êrişên li ser herêma Kurdan nirxand û wiha dawî li axaftina xwe anî: "Bi rastî, ez kesek im ku pir pêvajoya aştiyê dixwaze. Aştî ji bo her kesî tiştekî baş e. Lê gava em li rewşa heyî, ewranên tarî dinêrin, ez wê wekî samîmî nabînim. Ji aliyekî ve, hûn bi Kurdan re behsa aştiyê dikin, lê ji aliyê din ve, ew herêma me wêran dikin. Em hîn jî di şer de ne. Em hîn jî têdikoşin. Ji ber vê yekê ez bawer nakim. Ji min re jî samîmî xuya nake. Li her derê komkujî heye lê em ê li ber xwe bidin. Em paş ve gav navêjin."

 

Bi pêşengiya welatiyan têkoşîn

 

Ji gundê Xwarikê Ozlem Erhan jî wiha nêrînên xwe anî ziman: "Em naxwazin li cih û warê me JES bê çêkirin. JES dê bibe sedema qirkirina xwezayê. Xebata projeyê hêj di sala 2023’yan de hat destpêkirin. Ji derdorê re hat gotin ku ji bo xeta fay a erdhejê xebat tên kirin. Lê belê hatine axa li vir analîz kirine ku plansaziya projeyê kirine. Lê em îsal hinê proje û plansaziyê bûn. Bang li keyayê gundê me kirin û em wisa hinê projeyê bûn. Hewl didin ku bi dizî ve belgeyan bidin îmzekirin. Lê keya li dijî vê yekê derdikeve. Têkoşîn jî wisa bi pêşengiya welatiyên li vir û ciwanan dest pê kir. Piştre welatiyên derweyî bajar jî hatin piştevaniya me kirin. Komele, parlamenter, profesor, parêzer û hwd. beşdarî têkoşîna me bûn. Em ê heta dawiyê têbikoşin."

 

Di 24'ê Nîsanê de mîtîng 

 

Ozlem Erhan, diyar kir ku li dijî planê dê têkoşîna xwe mezin bikin û wiha dawî li axaftina xwe anî: "Em dixwazin welatê me şîn bimîne, avên me zelal bin. Em dixwazin hewaya me paqij bimîne. Em naxwazin jehrê bikşînin. Me ji dê û bavê xwe mîrateyek girtiye, em ê vê mîrateyê biparêzin. Em dixwazin vê mîratê ji bo zarok û neviyên xwe paqij bihêlin. Em li dijî vê projeyê ne. Divê destên xwe ji welatê me bikişînin. Çi dibe bila bibe, em ê dev ji têkoşîna xwe bernedin. Ger ev proje were bicîhanîn, em ê nikaribin sewalkariyê bikin. Xelkê vir dê hîn xizantir bibin. Ew ê neçar bimînin ku ji welatê xwe koç bikin. Welatekî me yê din tune. Welatê me ji me re bes e. Li dijî zilmê em her tim li ber xwe didin. Em ê heta dawiyê jî li ber xwe bidin. Di 24'ê Nîsanê de mîtîngek mezin a ekolojiyê dê hebe. Em ne tenê ji xelkê Gimgimê, lê di heman demê de ji hemî hezkiriyên xwezayê û her kesê ku ji vê mijarê hesas e jî piştgiriyê dixwazin. Werin em welatê xwe biparêzin."