Dayîkê ke tewrê çalakîya nobete bîyî: Lezkî tepişteyan vera bidê

  • 09:13 21 Teşrîna peyêne 2026
  • NAROJANE
ANQARA - Dayîkê ke Stenbol ra tewrê çalakîya nobete ya ke vernîya Wezaretê Edaletî de dest pêkerd bîyî, wina vatî: "Tepişteyanê nêweşan rê hewcedarîya refaketê dermanan est o. Heta ke Newroze, Evîne û heme tepişteyî nêrê veradayîş ma tîya ra nêşinê."
 
Bi waştişê tehliyekerdişê tepişteya nêweşa kanserî Evîn Zapsu û Newroz Bozkurte ke Nêweşxaneyê Bajarî yê Etlîkî de dermankerdişê losemîye vînena û seba 58 tepişteyanê nêweşanê giranan, vernîya Wezaretê Edaletî de çalakîya ronîştişî ya bêvenge dest pêkerd. Nobeta ke bi vengê Komeleya Piştîdayîş û Hetkarîya Keyeyê Tepişteyan û Hukumwerdoxan (TUAY-DER), DEM Partî, Komeleya Huqûqnasanê Semedê Azadîye (OHD), Komeleya Heqê Merdiman (ÎHD) dest pêkerd, her roje mîyanê 14.00 û 16.00ine de vernîya Wezaretî de do bidomîyo.
 
Dayîkê ke Stenbolî ra tewrê çalakîya nobete bîyî ajansê ma rê qisey kerdî.
 
'Tu kes nêeşkeno tutanê ma tehdît bikero'
 
Dayîka tepişteye Mizgîn Akman, Fînce Akman a ke Stenbol ra tewrê çalakîye bîya, dîyar kerd ke sere de semedê tepişteya Newroz Bozkurte û Evîn Zapsu û heme tepişteyanê nêweşan tewrê çalakîye bîya.
 
Fînce Akman wina va: "Nêverdenê Newroz Bozkurte bi dayîka xo dir pêvînayîş bikero. Eke keye israr bikero tehdîtê aye do ancî  berê koxuşa tepişteyanê nêweşxaneyî, kenê. Kes nêeşkeno tutanê ma tehdît bikero. Di tutê mi tepişte yê. Zerreyê dayîkan veşeno. Rengê rondikanê dayîkan çin o. No şermêko pîl o. Tepişteyê nêweşî semedê dermankerdişî veranêdanê. Ma vernîya Wezaretî de yê la kes ma nêvîneno."
 
'Dewlete çimanê xo girewta'
 
Fînce Akman bale ant prosesê Aştî û Cimatê Demokratîkî û no çî ard ziwan: "Vanê proses est o. O wext dewlete çira çîyêk nêkena? Şima pabeyê çi yê? Raşt o nika şer û merdiş çinê. La zîndanan ra cenazeyî vejenê. Ma no qebul nêkenê. No 3 rojî yo ma tîya yê. Dewlete çimanê xo girewta."
 
'Heta tepişteyî nêrê veradayîş ma tîya ra nêşinê'
 
Fînce Akman wina qedêna: "Tepişteyê nêweşan rê hewcedarîya refaketê dermanan est a. Heta ke Newroze, Evîne û heme tepişteyî nêrê veradayîş ma tîya ra nêşinê."
 
'Ganî tepişteyan ra dest pêbikerê'
 
Dayîka Aştîye Zeynep Çallihan a ke Stenbol ra tewrê çalakîye bîya wina va: "Ma semedê Newroze tîya yê. Ganî Newroze lezkî bêro veradayîş. Wa verê keyeyê xo de bêro dermankerdiş. Nêweşa kanserî ya. Katê bodrumî de yena dermankerdiş. Ma no qebul nêkenê. Ganî lezkî bêro veradayîş. Eke prosesêk est o lazim o vernî de bi tepişteyan dest pêbikerê."