Platformê Yewîya Neteweyî yê cinîyan her çar parçeyê Kurdistanî de dest pêkerd

  • 14:53 20 Teşrîna peyêne 2026
  • NAROJANE
MERKEZÊ XABERAN – Kombîyayîşê Platformê Pêroyî yê Neteweyî yê Cinîyanê Kurdan bi beşdarbîyayîşê temsîlkaranê her çar parçeyanê Kurdistanî bajarê Silêmanîye de dest pêkerd. Nê kombîyayîşî de problemê cinîyan, averşîyayîşê peyênî yê sîyasî yê herême de û amadekarîyê semedê viraştişê Kongreya Neteweyî ya Seyine yê Cinîyanê Kurdan yenê munaqeşekerdene.
 
Silêmanî de kombîyayîşê Platformê Yewîya Neteweyî ya Cinîyanê Kurdan bi beşdarbîyayîşê temsîlkaranê cinîyan ê her çar parçeyanê Kurdistanî, şexsîyetanê sîyasîyan, aktîvîstan û temsîlkaranê rêxistinanê cinîyan dest pêkerd.
 
Armancê sereyîn yê nê kombîyayîşî ke hetê Platformê Yewîya Neteweyî yê Cinîyanê Kurdan ra ameyî organîzekerdene, munaqeşekerdiş û parekerdişê vînayîşanê derheqê problemanê cinîyan, averşîyayîşanê peyênan û rewşa sîyasî ya herême de yo. Sewbîna xebata semedê xurtkerdişê yewîya neteweyî ya cinîyanê Kurdan û amadekarîyê Kongreya Neteweyî ya Seyine ya Cinîyanê Kurdan babetê bingeyîn ê.
 
Destpêkê kombîyayîşî de Şîrîn Tahir qiseykerdişê akerdişî yê kombîyayîşê serrane yê Yewîya Neteweyî ya Cinîyanê Kurdan û platformê pêroyî kerd. Şîrîn Tahir dîyar kerd ke kombîyayîşê ewroyî semedê kar û xebatanê înan ê ameyoxî qonaxêk muhîm o û qederdîyarkerde yo.
 
Şîrîn Tahir destnîşan kerd ke ê do kombîyayîşî de serê hîrê babetanê sereyîn û stratejîkan de vinderê; ê zî erjnayîşê rewşa sîyasî yê herême û Kurdistanî û tesîrê vurnayîşan ê serê heqanê cinîyan de, erjnayîşê rexneyî yê kar û têkoşînê demê vîyarteyî, sewbîna plansazî û amadekarîya semedê viraştişê Konferansê Seyine yê Yewîya Neteweyî yê Cinîyanê Kurdan bi armancê newekerdişî û yewkerdişê zêdeyêrî yê hêz û qabilîyetê cinîyanê Kurdan pêro wareyan de yê.