ŞIRNEX - Dayîka tepişteya nêweşe Tenzîle Acar a ke lîsteya tepişteyanê nêweşan ê ÎHDyî de ca gêna, nêweşîya aye ya zeriko kronîk û tuberkolozî est o, Rismiye Acar wina va: "Lazim o ke heme tepişteyî bêrê veradayîş û aştî pê bêro. Wa berê zîndanan bêrê akerdiş û tepişteyê nêweşî bêrê veradayîş."

 

Dimayê prosesê Aştî û Cimatê Demokratîkî ke bi vengdayîşê Rayberê Şarê Kurdî Abdullah Ocalanî dest pêkerd 20 aşmî vîyart û pêwa nê demî hema tepişteyê nêweşî nêameyî veradayîş. Rewşa tepişteyanê nêweşan her şina giranêr bena. Yew nê tepişteyan ra Tenzîle Acar a. Tenzîle Acar 2ê sibata 1995ine de Hezexê Şirnexî de ameya dinya. Emrêk qijî de zordarî nas kena û nê dir tewrê xebatanê partîyanê sîyasî bena. Tenzîle Acar 2017ine de şina Stenbol û yena tepiştiş. 9 serrî yo Zîndanê Cinîyanê Bakirkoyî de tepişte ya.

 

Tenzîle Acar lîsteya tepişteyanê nêweşan ê Komeleya Heqê Merdiman (ÎHD) de ca gêna, nêweşîyê aye yê zeriko kronîk û tuberkolozî est ê. Semedê ke Tenzîle Acar dermankerdişê bi kelepçe red kena û nêşina nêweşxane, rewşa aye de averşîyayîş çin o.

 

Dayîka Tenzîle Acar, Rismiye Acar a ke Hezex de ciwîyena, derheqê rewşa kênaya xo de qisey kerd.

 

'Dermankerdişê bi kelepçe qebul nêkena'

 

Rismiye Acar va ke kênaya aye Stenbol de ameya destbendkerdiş û tepiştiş û wina va: "Problemê aye yê weşîye cidî yê. Kênaya mi pêwa nêweşî tu wext mi rê nêvana ke rewşa aye xerab a. Nêwazena ez xemgîn bibî, mi ra niminena. La rewşa kênaya mi giran a. Ganî bêro dermankerdiş. Ne tena kênaya mi, heme tepişteyî wina yê. Bi sîstem nêşinê nêweşxane. Wexto ke benê zî bi kelepçe benê. Tepişteyî nê qebul nêkenê. Tu wext sere nêtewênenê."

 

'Ganî heme tepişteyê nêweşî bêrê veradayîş'

 

Rismiye Acar wina dewam kerd: "Lazim o ke tepişteyê nêweşî bêrê veradayîş. Ne tena kênaya mi, lazim o ke heme tepişteyî bêrê veradayîş. Kênaya mi bêra veradayîş, do derman bibo. Pêwa nêweşîyan kênaya mi têkoşîn kena. Tewr peyêne emser ez şîya pêvînayîşê kênaya xo. Rayîr dûr o. Hêzê mi çin o. Ma serre de di reyan şenê şêrê. Ez zî nêweş a. Nêşena hende rayîr şêrî. Waştişê mi no yo ke heme tepişteyî bêrê veradayîş. Zordarîyê zîndanan dewam kenê. Werdê înan baş nîyê. Ma aştî wazenê. Ganî tepişteyî bêrê veradayîş, berê zîndanan bêrê akerdiş."