COLEMÊRG - Hemsereka DEM Partîyî ya Geverî Cahîde Tore va ke ê çarçeweya 25ê teşrîna peyêne de Gever de atolyeya cinîyan û tutan pê anê. Cahîde Tore wina va: "Polîtîkaya bêcezaverdayîşî şîdetê mêrdan wayîr beno. Polîtîkayê şerê taybet cinîyanê kurdan hedef gênê. Bi felsefaya Jin Jiyan Azadî ma do her cayî de têkoşîn pîl bikerê."

 

Çarçeweya 25ê teşrîna peyêne Roja Têkoşînê Hemverê Şîdetê Cinîyan yê Mîyanneteweyî de, şîdet, qetilkerdiş, vînîkerdiş, desteştiş û polîtîkayê îstîsmarî ancî yenê rojeve. Her wareyî de cuya cinîyan bi hêrîşanê hemverê destkewtişan yena ablûqakerdiş. Cinî hemverê nê polîtîkayan pawitişê esasî û rêxistinbîyayîşê xo her cayî de pîl kenê. Ver bi 25ê teşrîna peyêne cinî xo amade kenê ke heme bajaran de bikewê kuçeyan.

 

Îdarekara Partîya Têduştî û Demokrasîyê Şaran (DEM Partî) ya Geverî Cahîde Tore çarçeweya 25ê teşrîna peyêne de qisey kerd.

 

'Atolyeyê ma do bibê'

 

Cahîde Tore va ke ê Colemêrg û qezayan de çarçeweya 25ê teşrîna peyêne de bi taybetî dewan de atolyeyê cinîyan û tutan pê anê û tena bi tîya sînordar nêmanenê, ê her cayî de xebatan domnenê. Cahîde Tore wina va: "Atolyeya bi nameyê sey dayîk, tut, têkilîyê tutan, cinsîyetê komelî û hişmendîya cinsîyetî yê. Yew sebebê xebata ma ya dewan, hetê ke bi hêz, rêxistinbîyayîş û xoserbîyayîşê xo ciwîyeno yo. Nê semedî ra lazim o ke ma nê tewir cayan de hîna zêde xebatê hişmendîye bidomnê."

 

'Ma do her wareyî de têkoşîn bidomnê'

 

Cahîde Tore dîyar kerd ke ê taxan de pêvînayîşê cinîyan pê anê û wina dewam kerd: "Semedê ke rolê serkewtişê cinîyan vejîyo orte ma xebatan domnenê. Na xebate do 25ê teşrîna peyêne sînordar nêmano. Ma do hemverê desteştiş, şîdet, qetilkerdişê cinîyan her cayî de meydanan de bê û têkoşîn bidomnê. Prosesê peyêne de qetilkerdişê cinîyan zêde bîyî. Merdişê cinîyan bêceza yenê verdayîş. Îqtîdar bi polîtîkaya bêcezaverdayîşî mêrdan paweno û cesaretî dano mêrdan. Mîsal Gulistan Doku û Rojîn Kabaîşe û zaf bînî est ê."

 

'Bi polîtîkayê şerê taybet cinîyê kurdan yenê hedefgirewtiş'

 

 

Cahîde Tore dewam de wina ard ziwan: "Bi destê dewlete bi polîtîkayê şerê taybet cinîyê kurdan yenê hedefgirewtiş. Her wareyî de hemverê hişmendî, rêxistinbîyayîş û cuya cinîyanê kurdan hêrîşî est ê. Kurdistan de cinî yenê hedefgirewtiş. Bêguman Colemêrg û qezayanê ci de zî cinî dewlete rê hedef ê."

 

'Ma do bi "Jin Jiyan Azadî" meydanan de bê'

 

Cahîde Tore peynîya qiseykerdişê xo de dîyar kerd ke ê Colemêrg û qezayanê ci de hemverê polîtîkayê şerê taybet 25ê teşrîna peyêne de meydanan de bê û va: "Ma do bi rêxistinbîyayîş, bi pîya rêxistinbîyayîşê xo awan bikerê û biqîrê. Ma venga rayepêroyî kenê, hemverê şîdetê mêrdan wa polîtîkayê bêcezaverdayîşî pê nêarê. Cuyêka azad, têduşt û bêşîdet mumkin a. Semedê nê ma do bi felsefaya 'Jin jiyan azadî' meydanan de bê."