ÊLIH - Evîndar Tîgrak 7ê hezîrana 2025ine de vînî bî. Dayîka Evîndar Tîgrakî Nefîse Tîgrak derheqê vînîbîyayîşê kênaya xo de wina va: "Kênaya mi va 'Semedê mi bikişo, mi berd serê koyêk, zinca mi şikna û şîdet mi ser o kerd.' Ez venga heme cinîyan kena ke dewaya de verê ma de bibê."

 

Êlih de 7ê hezîrana 2025ine de cinîya bi nameyê Evîndar Tîgrak a 31 serrî vînî bî û agahî aye ra nêame girewtiş. Keyeyê aye muracatê kerd û nê ser o cipersayîş dest pêkerd. Cipersayîşê merdişê biguman ser o vindert, hetê Serdozgerîya Komare ya Êlihî ra yeno domnayîş. Çarçeweya cipersayîşî de qeydê HTSyî, dayeyê Sîstemê Naskerdişê Plakayî (PTS), îfadeyê şahidan û dayeyê biyolojîkî yê wesayîtê gumanbarêk de, vejîya orte ke beno ke Evîndar Tîgrak ameya qetilkerdiş. Goreyê agahîyanê ke dosyaye de yê, verê ke Evîndar Tîgrak vînî bibo, derheqê gumanbaranê N.Yî de gerre kerdo û qerarê dûrvistişî girewto.

 

Semedê sucê 'bi qestî û plankerdeyî kiştiş' ameyî tepiştiş

 

Çarçeweya cipersayîşî de aşma tebaxa 2026ine de N.Y û Y.D ameyî destbendkerdiş û semedê sucê 'bi qestî û plankerdeyî kese kiştişî' ameyî tepiştiş. Ronîştişê verêne yê dewa 15ê teşrîna peyêne de ame dîyayîş û heyetê dadgehe qerarê dewamkerdişê her di gumanbaran da. Roniştişo bîn zî taloqî 4ê kanûne ame kerdiş.

 

Dayîka Evîndar Tîgrake, Nefîse Tîgrak derheqê dewaye de qisey kerd.

 

Bi merdiş tehdit kerda

 

Nefîse Tîgrak va ke kênaya aye Evîndar Tîgrak dimayê ke dest mêrdeyê ke ey dir ameybî zewicnayîş verda, bajarêk bîn de bica bîya û wina va: "Dimayê mêrdeyê ke ey ra cîya bîbî, geyrayo û vato bê tîya. Kênaya mi verê ey de xebitîya û her wext ey dir bîya. Kênaya mi va 'Semedê mi bikişo, ez berda serê koyêk û zinca mi şikina û şîdet mi ser o kerd.' Ez esteyê kênaya xo wazena. Dimayê ke keye ra şî her hewte mi rê gerîyayêne. Tutanê xo dir qisey kerdêne."

 

'Îşkence kênaya mi ser o kerdo'

 

Nefîse Tîgrak wina ard ziwan: "Ma demêk nêresayî kênaya mi. Ma muracat kerd. Kênaya mi pêwa N.Y xebitîyênê. Semedê karkeranê ke rayîr viraştêne werd viraştêne. Zaf îşkence kênaya mi ser o kerdo. Kênaya mi waştêne ke verê mêrdeyî xo ra şêro la destûr nêdayo. Mi vatêne bê verê ma la vatêne destûr nêdano. Ma agahî aye ra nêgirewt û ma muracatê qereqolî kerd. Qereqolî de fotografê N.Yî nîşan danê û vanê ti na nas kena? Mêrdeyê mi zî vano ez nênasnena. Dimayê muracatî ma her çî mûsayî. Ma vatêne bajarêk bîn de ya. Ma nêzanitêne Êlih de ya. Ez cenazeya kênaya xo wazena. Ez cinîyan ra piştîdayîş wazena. Wa dadgehe de verê ma de bibê û hêz bidê ma."