SEMSÛR- Platformê Sazîyanê Demokratîkî yê Semsûrî, hepisxaneya Semsûrî ver de seba hepsîyê nêweşî eşkerayî da. Eşkerayî de ame dîyarkerdene ke no proses de berdayîşê hepsîyê nêweşî heqêko bingeyin o û wina vat: “Hepsîyêko nêweş zî ke nêbêro berdayene, no hem vera prosesî hem zî vera huqûqê waûbiratîye de hêrişêko eşkera yo.”

 

Platformê Sazîyanê Demokratîkî yê Semsûrî, seba hepsîyanê nêweşan hepisxaneyê Semsûrî ver de, terba endamanê sazîyanê demokratîkan û Parlamenterê DEM Partî yê Mersînî Alî Bozanî reyde eşkerayî da. Çalakî de pankartê “Seba heqê cuyî wa hepsîyê nêweşî demildest bêrê berdayene” ame akerdene û “Xoverdayîşê hepisxaneyan bicuyo” zî ameyî vatene.

 

Eşkerayî, hetê Hemverfekê TUHAY-DERî yê Semsûrî Erkan Karakaşî ra ame wendene.

 

Eşkerayî de, seba berdayîşê hepsîyê nêweşî nêameyîşî, ke bi sebebê keyfî yo, bertek ame mojnayîş û ame vatene ke ganî astengîyê verê berdayîşî bêrê hewanayîş. Ê hetan de zî eşkerayî de ame vatene ke seba hepsîyê nêweşî Tuncer Saglamî, ke ganê xo ra bî, ganî cipersayişêko bibandor bêro kerdene û keyeyî rê sersaxî ame waştene.

 

Parlamenterê DEM Partî Alî Bozanî zî eşkerayî de qisey kerd û dîyar kerd ke merdiş hepisxaneyan de qeder nîyo, berovajî ey, qetl o û wina vat: “Ma AKP’yî rê vanê; ganî hepsîyê nêweşî demildest bêrê verdayene. Nê welatî rê bi hawayêko lez rêziknameyêka neweye yê înfazî hewce ya. Ganî dest bi sozanê bêmaneyan ra veradê û gamê adilî bêrê eştene.”