Pelşîn Çetinkaya

 

AMED - Şaredarîya Bajarê Girdî ya Amedî ke xebatanê xo yê vera welatijanê ke bi nêweşîyanê kronîkan dir ciwîyenê rê xizmetê weşîye ra zêdeyêr domnena, bale ancena serê barê ewnîyayîşî yê serê milê cinîyan. Bi teqsîya cimatî, xidayê bêglutenî, terapî û diyetisyenî keda cinîyan a ke nîna vînayîş vecena meydan û xurtkerdişê resayîşê têduştî yê heqê weşîye hedef kena.

 

Serekîya Daîreya Xizmetanê Astengdaran û Kalan û Pîran a Şaredarîya Bajarê Girdî ya Amedî, bi armancê ke kesê astengdar, kal û pîr zêdeyêr tewrê wareyê cuye bibê û standardê cuya înan bêro başkerdiş xebatanê xo domnena. Derheqê kesanê astengdaran de xebatê şêwirmendî, neqilkerdiş, hacetê medîkalî, perwerde û atolyeyî yenê dayene, semedê kesanê ke nêweşîyê înan ê kronîkî est ê zî paştdayîşê tewir bi tewir yenê dayene.

 

Binê banê Serekîya Daîre de Midûrîya Şubeyê Astengdaran, Midûrîya Şubeyê Nêweşîyanê Kronîkan û Midûrîya Xizmetanê Kalan û Pîran esta. Binê banê Midûrîya Şubeyê Astengdaran de zî Merkezê Paştdayîşî semedê Astengdaran, Merkezê Cuye Pîya, Keyeyê Molayî yê Şehîtlîkî û Keyeyê Molayî yê Peyasî xizmet danê. Binê banê Şubeyê Xizmetanê Kalan û Pîran de Yewîya Xizmetanê Kalan û Pîran û Yewîya Sanikvatoxan xebatanê xo domnenê.

 

Midûra Şubeyê Nêweşîyanê Kronîkan Sevda Erdem Ateş derheqê xebatanê ke binê banê şaredarî de yenê domnayîş de qisey kerd.

 

Polîtîkayêka paştdayîş û weşîye ya ke barê cinîyan asan kena

 

Sevda Erdem Ateş neql kerd ke bi xebatanê ke domnenê bale ancenê serê keda cinîyan a ke nêşinasiyena û vat: “Midûrîya Nêweşîyanê Kronîkan serê serra 2025ine de ame awankerdiş û zaf xebatî kerdî cuye. Heta ewro kolîyê çolyakî ameyî vilakerdiş, perwerdeyê weykerdişê bêglutenî, semedê nêweşanê kanserî rehet şêrê û bêrê teqsiya cimatî kewte cuye, perwerde semedê nêweşan ame dayene, hetkarîya medîkalî û diyetisyenî ame dayene. Nokteya esasî ya nê nêweşîyan no bî ke keda cinîyan a ke nêşinasiyêne bêro asayene.”

 

‘Nêweşîye tesîrê serê cuya cinîyan keno’

 

Sevda Erdem Ateş vat nêweşîyê kronîkî tesîrê serê cuya keyeyî kenê û bi taybetî zî serê yê cinîyan kenê û vat: “Na nêweşîye tena problemê weşîye ya kesî bêpar anê. Tesîr cuya keyeyî kenê. Baro giran keweno serê milê cinîye. Cinîyî weykerdişê tutanê xo yê nêweşan taqîb kenê, refakat kenê, qaytê kalan û pîran kenê. Ma bi xebatanê xo di çîyan kenê; ma baro ekonomîk kêm kenê, barê ewnîyayîşî asan kenê. Her wina ma bi xizmetê teqsiya cimatî prosesê tedavîkerdişê nêweşanê kanserî zî asan kerd û baro ekonomîk, barê serê cinîyan asan kerd. Bi teqsiya cimatî barê tedavîkerdişê nêweşanê kanserî ame asankerdiş.”

 

‘Ma terapîyanê şexsî û komîyan muhîm vînênê’

 

Sevda Erdem Ateş ard ziwan ke bi terapîyanê komîyan hîsê tenêtîye yê cinîyan miyan ra darenê we û semedê parekerdişê tecrûbe û paştdayîşê înan paştdayîş yeno dayene. Sevda Erdem Ateş wina vat: “Semedê ke cinîyî xo tenê hîs nêkerê û ma hêz bidê înan paştdayîşê diyetisyenî û vînayîşê keda cinîyan a zereyê keyeyî de nê terapîyê şexsî û komîyî erjan ê. Ma paştdayîşê diyetisyenî danê û bi zanayîşê profesyonelî paştdayîş danê înan. Xizmetê weşîye teyna bi dermankerdişî dir sînordar nîyê. Bi polîtîkaya ke baro giran ê serê cinîyan û ekonomî kêm keno gênê dest. Ma hacetê tansiyon û medîkalî zî danê.”