Azîze Akoglu

 

ANQARA - Hemsereka Şubeyê ÎHD’yî ya Anqarayî Sevîl Turgut bale ante serê binpaykerdişê heqan ê mîyanê zindanan û neql kerd ke tehlîyeyê tepişteyan bi bahaneyê demdergî yeno astengkerdiş û ganî lezgînî Heyetê Îdarî û Taqîbkerdişî bêrê wedartene.

 

Zindananê Kurdistan û Tirkîya de, tepişteyî binpaykerdişanê heqan ê giranan dir yenê rî bi rî. Komîsyonê Zindanan ê Komeleya Heqanê Merdiman (ÎHD) ya Anqarayî rojanê peyênan de raporêk eşkera kerd û neql kerd ke 38 zindananê Anatolya Mîyanênî de serra 2025ine de vera tepişteyan tewr tay 2 hezar û 338 binpaykerdişê heqan ameyê ciwîyayene. Bi taybetî zindanê Cinîyan ê Sîncanî de tehlîyeyê tepişteyanê cinîyan bi bahaneyanê kêfî hetê Heyetê Îdarî û Taqîbkerdişî ra yena astengkerdiş.

 

Hemsereka Komeleya Heqanê Merdiman (ÎHD) ya Anqarayî Sevîl Turgute, binpaykerdişê heqan ê mîyanê zindanan erjnayî.

 

‘ÎGK xo keno cayê dadgehanê dîyine’

 

Sevîl Turgute neql kerd ke bi serran o zindanê Sîncanî de tepişteya cinî pêwa ke wextê înfazî pirr kerdo û tepişteyê cinî yê ke 30 serrî yo tepişte yê est ê û vat: “Bi qeraranê heyetî tahlîyeyê înan yeno astengkerdiş. Bi bahaneyê demdergî tehlîye yeno astengkerdiş. Cezaya xo girewtê, qedênayê labelê ÎGK xo keno cayê dadgeha dîyine û beno asteng. Şixulnayîşê awe ra heta wendişê kitaban, ferzkerdişê poşmanîye û bi bahaneyê kêfî azadîya merdiman yena xespkerdiş.”

 

‘Tepişteyî bi caardişê teberê merdimayî dir rî bi rî yê’

 

Sevîl Turgute dîyar kerd ke tepişteyî nêeşkenê xo biresnê heqê weşîye û nê erjnayîşî kerd: “Cigêrayîşê viranî, cigêrayîşê fekî, bi wesayîtê rîngî berdiş û ardiş, bi kelepçeyî tedavîkerdiş. Nê caardişî û zafêrê înan zindananê Anatolya Mîyanêne de est ê. Bi taybetî nê 15 serran de rewşa zindanan giran bena. Azadî û heqê merdiman yeno xespkerdiş. Tepişteyî binpaykerdişanê demdergî dir yenê rî bi rî.”

 

‘Nêeşkenê heqanê xo bişixulnê’

 

Sevîl Turgute peynîya qiseykerdişê xo de ard ziwan ke merdimê ke dadgehe ceza înan rê birnaya, reya dîyine hewl yeno dayene ke bêrê cezakerdiş û wina peynî da: “Her kes wayîrê heqê ke bi ziwanê xo biwano, binûso yo. Labelê nêeşkenê nê heqî bişixulnê. Kitabê ke îdare destûr dano kenê zere. Cil û belgê ke îdare destûr dano kenê zere. Nê caardişî vera rûmetê merdiman ê. Ganî lezgînî nê heyetî bêrê wedartene. Ganî tepişteyê ke cezaya înan qedîyaya bêrê tehlîyekerdene. No wextêko derg o ma nê çîyî anê ziwan û ma do her tim bîyarê ziwan. Ganî her kes vera binpaykerdişan de vengê xo berz bikero. Ma do têkoşînê xo bidomnê.”