Buşra Turan

 

AGIRÎ - Şaredarîya Agirî xebatê cinîyan ê ke wextê qeyûman de orte ra ameybî wedaritiş, newe ra awan kena. Bi Midûrîya Polîtîkayanê Cinîyan û Merkezê Paştîdayîşê Cinîyan ê Zîn, paştdayîşê huqûqî, cimatî û psîkolojîk dîyena cinîyan û seba ke cinîyî bibê wayîrê qisey, taxan de paştdayîş mûnena.

 

Şaredarîya Agirî ke newe ra awankerdişê destkewtişanê cinîyan hedef kena, xebatanê cinîyan dewam kena. Dimayê weçinitîşê herêmî yê 31ê Adare, şaredarîye Midûrîya Polîtîkayanê Cinîyan awan kerd û serra 2024ine de zî Merkezê Paştîdayîşê Cinîyan ê Zîn akerd. Bi Midûrîya Polîtîkayanê Cinîyan û Merkezê Paştîdayîşê Cinîyan ê Zîn, paştîdayîşê huqûqî, cimatî û psîkolojîk dîyena cinîyan û seba ke cinî bibê wayîrê qisey, taxan de paştîdayîş mûnena.

 

Hetkara hemserekê şaredarîya Agirî Benazîr Aydemîr Kaya derheqê xebatan de qisey kerd.

 

Ya ewilî polîtîkaya azadîya cinîyan a

 

Benazîr Aydemîr Kaya da zanayene ke dimayê weçinitîşanê 2024ine ra tepîya şaredarîye de xebatê cinîyan dayê destpêkerdene û seba xurtkerdişê paştîdayîşî gamî eştî. Benazîr Aydemîr Kaya wina va: “Weçinitîşêko zehmet bi. Eksê heme kayan ma biserkewtî. Senî ke ma qezenc kerd, bi ewnîyayîşê demokratîk, ekolojîk û azadîya cinîyan ma xebatê xo dayî destpêkerdene. Ma komîsyonê cinîyan awan kerdî. Ma Midûrîya Polîtîkayanê Cinîyan awan kerd. Ma psîkolog û hevalê perwerdekarî tewrê kadroyê xo kerdî û ekîbe hîra kerd. Dima ra zî ma banêko ke baxçeyê şaredarîye de veng bi tadîlat kerd û bi nameyê Merkezê Paştîdayîşê Cinîyan ê Zîn akerd.”

 

Xebatê seba cinî û tutan

 

Benazîr Aydemîr Kaya ard ziwan ke merkez de seba cinîyan zî cayî awan kerdî û wina dewam kerd: “Cinîyan paştîdayîşê psîkolojîk girewtî. Ma atolyeyan akerd. Atolyeya resimî eleqe dî. Ma do nawitgeh akerê. Wextê ke ma nê kerdî, ma tutî zî esas girewtî. Ma seba tutanê ke dayîkanê xo dir ameybî, cayêko qij akerd. Bi nê tewirî dayîkan karê xo rehetêr kerdî.”

 

18 taxan de xebate

 

Benazîr Aydemîr Kaya destnîşan kerd ke roja ameyî wezîfe, xebatê paştîdayîşê seba cinîyan taxan de dewam kenê û resenê cinîyanê hewcedaran û wina ard ziwan: “Cinîyê ke yenê kursê spor û resimî, cinîyanê ke rewşa înan a ekonomî weş nîya dir kewenê paştîdayîş. Mîsal ez vaja, seba cinîyêka paştîdayîşê aşmane ameye girêdayene. Hevalêka cinî di hazar dana, hevala bîne zî paştîdayîş dana. 3-4 cinîyî nê bi tewirêko komunal rayra benê. Nika 18 taxanê Agirî de xebatê cinîyan yenê rayraberdene. Ber bi ber xebatî yenê domnayîş. Cinî babetanê şîdetî û pawitişê xo de yenê agahdarkerdene.”

 

‘Ma komunê cinîyan awan kerdî’

 

Benazîr Aydemîr Kaya dîyar kerde ke xebatanê ke taxan de rayra benê de vera feqîrîya girane tora paştîdayîşê awan kerdê û wina erjnayîş kerd: “Xebatan de cinîyê ke rewşa înan zaf xirab a, yenê tespîtkerdene. Ma bi nînan tora paştîdayîşê awan kerde. Ê ke rewşa înan zaf xirab bî seba înan ban û hacetî ameyî peydakerdene. Esas de Merkezê Paştîdayîşê Zîn de cuyêka komunal zî yena mûnayîş. Roja ma ameyî serê wezîfe heta nika ma hîrê merkezê cinîyan akerdî. Termînal de seba dayîk û tutan ma merkezêk akerd. Garajê qezayî de zî ma seba dayîk û tutan merkezêk akerd. Xebatê cinîyan dewam kenê. Merkezê ma yo bîn zî vernîya zîndanî de yo. Seba cinîyanê ke şinê zîndan û boya xo danê nê merkezî ameyî akerdene. Sewbîna ma Parka Aşitî û Cinî zî serranê verênan de akerd. Pêwa nê, xebatê ma yê viraştişê kitabxaneyî est ê. Projeyê ma yê seba wextê neweyî est ê. Atolye û faliyetê ma yê perwerdeyî do dewam bikerê.”