Neslîhan Kardaş

 

ŞIRNEX - Cinîyanê Botanî yê ke mîkrofonê ma rê derheqê azadîya fîzîkî ya Rayberê Şarê Kurdî Abdullah Ocalanî û prosesî de qisey kerdî, mesajê ke aştî, bêazadîya Abdullah Ocalanî nîna bidestkerdiş dayî.

 

Dimayê vengdayîşê Abdullah Ocalanî yê 27ê sibata 2025ine ya semedê aştî û cimatêk demokratîkî, sere de Kurdistan û Tirkîya de prosesêk newe dest pêkerd. Her çiqas no veng hetê zafê grubê dinya ra ame piştîdayîş zî yeno pabebîyayîş ke cewabêk hukmatî ra zî bêro dayîş. Şarê kurdî bi taybetî cinîyê kurdî bêmabêne dîyar kenê ke aştî û demokratîkbîyayîşê Tirkîya azadîya Rayberê Şarê Kurdî Abdullah Ocalanî ra vîyarena.

 

Cinîyê Botanî proses û azadîya Abdullah Ocalanî ser o qisey kerdî.

 

‘Mîmarê aştîye wezîfeyê xo pê ard’

 

Dayîkanê Aştîye ra Asya Tay, bale ant prosesê ke bi vengê Abdullah Ocalanî yê nêzdîyê di serrî verî dest pêkerd û va: “Rayber Apo her çî ke eşkayo û hêvî kerdêne pê ard. PKK kongreya xo pê ard, merasîmê veşnayîşê çekan organîze kerd û Tirkîya ra xo ant. Roja ke veng ame dayîş ra tu kes nêame kiştiş û zerîya tu dayîkêke nêşikîya. Venga ma berpirsîyaran rê no yo ke her kes rolê xo kay bikero û semedê aştîye destê xo derg bikero. Eke şer ancî dest pêbikero, do semedê her kesî zaf xirab bibo û Tirkîya do zirarê tewr pîl bivîno. Sey dayîkî, ma veng danê kesanê ke eşkenê aştî bîyarê ke destanê xo bikerê binê kerra û piştîdayîşê vengdayîşî bidê. Wa ma heme têduşt û azad biciwîyê. Mîmarê aştîye rolê xo kerd. Vengdayîşê ma Bahçelî û Erdoganî rê yo. Wa Bahçelî û Erdogan berpirsîyarîyanê xo bica bîyarê. Ma bi şer nêeşkenê çîyêk bidest bikerê. Wa no şer peynî bibo.”

 

‘Bêazadîya Abdullah Ocalanî aştî pê nîna’

 

Asya Tay dîyar kerd ke ganî Abdullah Ocalan azad bibo û va: “Her cayê dinya de, her rayber bi şarê xo dir o. Vengdayîşê ma no yo ke rayberê ma azad bibo û şarê xo dir yew bibo. Abdullah Ocalan tena aştî wazeno. Bêazadîya Abdullah Ocalanî aştî pê nîna. Eke o azad bibo, ma eşkenê masa ser o rûşê û aştî pê bîyarê. Sewbîna ma veng danê heme dewletê mîyanneteweyî ke goşdarê vengê ma bibê û semedê qetîkerdişê aştîye rolê xo bikerê.”

 

‘Heta ke rayberê ma azad nêbo, ma zî nêeşkenê azad bibê’

 

Dayîka Aştîye Emîne Yaliç zî dîyar kerd ke ê bi hêvîya aştîye kewtî serra 2026ine û va: “Ma pabeyê azadîya Rayberê Şarê Kurdî Abdullah Ocalanî û tepişteyanê sîyasîyanê bînan bî. Heta ke ê azad nêbê, ma zî nêeşkenê azad bê. Azadîya ma bi azadîya rayberê ma girêdayeya. Ma pabeyê serbestveradayîşê rayberê xo yê. Wexto ke ma ewnîyenê, hema zî hetê hukmatî ra gamêke nêameya eştiş. Zafê tutê kurdî têkoşînê azadîye de şehîd bîyî, ameyî tepiştiş, yan zî ma nêzanê cenazeya înan ça de ya û ça de ameyê definkerdiş. Ma wazenê cayê cenazeyanê tutanê ma bêro eşkerakerdiş. Heta ke rayberê ma azad nêbo, ma zî nêeşkenê azad bê. Ma şer nêwazenê. Wa êdî kes nêmiro. Demê ke proses dest pêkerd, merdiş vindarya û nê semedî ra, ganî dewlete zî gamêke bierzo.”

 

‘Ganî rayberê ma azad bibo’

 

Hemsereka Partîya Têduştî û Demokrasîyê Şaran (DEM Partî) ya qezaya Silopî Besê Cvîz zî va: “Vengdayîşê Abdullah Ocalanî dir prosesêk newe dest pêkerd. Her çiqas her çî bi hawayêk pozîtîf aver biherikîyo zî serrêk ra zêde vîyart, la AKP hema zî gamêke nêeşta. Abdullah Ocalan çiqas aştîye ser o israr bikero zî dewlete gamêke zî nêerzena. Destpêkê prosesî ra, kurdan zaf gamî eştî. Ma no heme dinya rê vanê: bi azadîya rayberê xo, ma zî do ziwan, kultur û cuya xo de azad bê. Wa êdî zerîya tu dayîkêke nêveşo. Ma wazenê azad bê, sey heme şarê dinya. Rayberê ma ganî bêro azadkerdiş. Eke rayberê ma azad bibo, ma zî do azad bibê.”