MERKEZÊ XEBERAN- Endama Konseya Rayraberdişî ya KJK’yî Çîgdem Dogu vat bi esasgirewtişê nêzdîbîyayîşanê Rayber Apoyî cehd kenê prosesê Haştî û Komelê Demokratîkî aver berê û vat: “Şer nika vinderto la ma hêzêkê polîtîk ê ke têkoşîn kenê. Têkoşînê ma dewam keno.”

 

Endama Konseya Rayraberdişî ya KJKyî Çîgdem Dogu ke beşdarê programêkê taybetî yê televîzyonê Medya Haberî bîye, derheqê prosesî de erjnayîşê muhîmî kerdî.

 

Semedê averşîyayîşê prosesê ganî çi bêro kerdiş?

 

Çîgdem Dogu derheqê merheleya prosesê Haştî û Komelê Demokratîkî de qisey kerd û bale ante ke Rayber Apoyî seba averberdişê prosesî cehd keno. Aye îfade kerd ke derheqê naye de îqtîdarê AKP’yî de kêmasîyê cîdî est ê, û seba ke proses biweşîye dewam bikero, bi taybetî cinî û ciwanan rê rolêkê muhîm keweno.

 

Çîgdem Dogu vat ke mîyanê prosesêkê winayî de, bi taybetî sere de hêrişê vera CHP’yî û hêrişê vera hêzanê muxalîfan qebûl nêbenê û ganî vera nê hêrişan pozîsyonêko hempar bêro mojnayene. Dogu vat ke nê tewir nêzdîbîyayîşê vera CHP’yî, derheqê samîmî bîyayena hukmatî de şik virazeno. ke îqtîdar prosesî çiqas samîmî gêno.

 

Çîgdem Dogu vera qebûlnêkerdişê statuyê YPJ’yî yê hetê hukmatê HTŞ’yî ra zî reaksîyon da û vat: “YPJ’yî eslê xo de statuyê xo afirnayo, nasnameyê xo afirnayo. Îradeyêko wina ke bi fîlî vejîyayo meydan, est o. Qerarê naye nêkewno destê hukmatê Sûrîye. Mîyanê sînoranê Rojawanî de têkoşînê YPJ’yî çîyêko zaf muhîm o. La sey cinîyanê Rojhelatê Mîyanênî, hem cinîyê kurdî yê heme parçeyanê Kurdîstanî, hem cinîyê Rojhelatê Mîyanênî, hem zî cinîyê dinya, ganî ma YPJ’yî tena nêverdê. YPJ’yî senî şerê germî de bi nameyê heme cinîyan têkoşîn da, ganî nika zî heme cinîyê dinya YPJ’yî sey rûmetê xo, sey nasnameyê xo bivînê û wayîr bivejîyê.”

 

Çîgdem Dogu vat ke nê beyanê nîyetî başî ra teber, hema gamêka şênbere orte de çin a. Aye vat ke 100 serrî yo ke bêçareserî û şer mîyanê şarê kurd û tirkan de ciwîyeno, û seba ke vera naye raştîyêka haştî û huqûqê wayûbiratîye bêro ronayene, nê gamî qet nêvinderê. Dogu ard ziwan ke Rayber Apoyî şertanê tecrîdî de cehdêkê zaf pîl ê haştîye keno û ganî no zî sey xoverdayîşêk bêro erjnayene.

 

Çîgdem Dogu bale ante ke tewr muhîm, komelkîkerdişê nê xebatî yo: “Haştî çîyêko wina nîyo ke tena bi qerarê beşêkê corî bêro caardene. No teqez ganî sey prosesê ke şar, bi taybetî cinî bi fîlî tede bê û îradeyê xo ronê, bixebitîyo.” Aye vat ke zaafê tewr girdî yê prosesî, no nêbeşdarbîyayîşê beşan o.

 

Çîgdem Dogu, vateyê Rayber Apoyî yê pêdîyayîşê peyênî yê bi heyetê DEM Partî reyde ard ziwan: “Bê fikrê girdî û erjanê etîkan ê girdan nêbeno ke komelê ke bi hêrsêkê girdî bêrê vurnayene. Coka ganî prosesî de lez bêro kerdene.” Dogu vat ke Rayber Apoyî verê zî vatbî ke “hewceyîye bi aqilêkê dewlete yo ke aqilê partîyan vîyarte yo est o” û o bi tersanê komelkî nêzdî beno.

 

Problemêk cidî yê demokrasî est o

 

Çîgdem Dogu vat ke Tirkîya problemêkê cîdî yê demokrasî est o û fehmê dewletgirî ke bi seserran o komelî de ciwîyeno, însanan keno seke hertim ver bi dewlete û îqtîdarî biewnîyê. Aye vat ke betalkerdişê kongreya 38. ya CHP’yî û qerarê butlanê mutlaqî, mudaxeleyêka xorîne ya zereyê yew partî ya ke dinya de nimûneyê ci nêdîyayo, û no qebûl nêbeno hem seba demokrasî hem zî seba averşîyayîşê prosesê haştî. Çîgdem Dogu vat ke ganî vera nê hêrişî pozîsyonêko hempar bêro mojnayene û şarê kurd û Tirkîya bibê temînatê demokrasî.

 

Eko-rijnayîş est o

 

“Şer bi tewirê xo yê verênî vinderto la bi tewirêkê neweyî dewam keno. Zerarê ke ocaxêka madenî dana xoza ro, merdim nêeşkeno şerî ra cîya bivîno. Şirketî bi tewirêkê sey şerî vera xoza û şar hêriş kenê.” Aye vat ke nê heme, hêrişê JES û madenan, sey parçeyê polîtîkaya qirkerdişî yenê erjnayene û vera naye de xoverdayîşêko girs, sey Gimgim û Dêrsimî de, est o.

 

Çîgdem Dogu bale ante ke vera eko-rijnayîşî ganî aqilê partî bêro vîyartene û heme beşê komelî, qet ferq nêkerdene kam AKPij yan DEMij o, pîya têkoşîn bikerê, çunke zerarê madenan ferq nêkeno, qet kesêk nêverdano.

 

YPJ rêxistina xopawitişî ya

 

Çîgdem Dogu vat ke Îdareyê Xoserî de nêzdîyê 14-15 serran şarî bê dewlete xo bi xo îdare kerd û no laboratuwarêko muezzem ê demokrasîya bêdewlete bî. Aye vat ke stratejî entegrasyonê demokratîk o, demokratîkbîyayîşê dewlete û entegrebîyayîşê îradeyê şarî ser bingeyêkê demokratîkî la mîyanê entegrasyonê nikayî de problemî dîyar benê, çunke hukmatê Sûrîye wazeno giranîya xo ya merkezî rono û îradeyê komelê demokratîkî û cinîyan bin de verdo.

 

Çîgdem Dogu vat ke YPJ tena rêxistina xopawitişî ya cinîyanê kurdan ê Rojawanî nîyo, bîyo hêzêko universal: “Hukmatê Sûrîye nêeşkeno qerarê YPJyî bido. Ganî heme cinîyê dinya, bi taybetî cinîyê kurd, biresê kampanyaya ‘Ma Pêro YPJij ê’ û YPJyî wayîr bivejê. Çunke dewamê estbîyayîşî bi pawitişî yo; dinya de estbîyayîşêko bêpawitiş çin o.”

 

Çîgdem Dogu peynî de vat ke aşma hezîrane aşma şehîdanê fedayîyan ê cinîyan a û bi nameyê embaze Gulane, Sema Yuce û Zîlane prosesê ameyoxî bi serkêşîya nê şehîdan dest bi gamê “Nika Wextê Cinîye yo” kerd: “Fedayîtî eslê xo de tewirêkê cuya komunal o, heskerdişê azadî yo. Ganî ma têkoşînê azadîya cinîyan bi xeta manadare y a Zîlane hîna xurt bikerê. Nika wextê cinîyan o.”