MERKEZÊ XEBERAN - Sereka Komeleya Doktoran ê Dinya (WMA) neql kerd ke semedê rewşa weşîyeyî ya Nêrgîz Mihemadî endîşeyîn ê û veng da selahîyetdaranê Îranî ke lezkî dermankerdişê doktorî yê lazimî semedê Nêrgîz Mihemadî bidê.

 

Sereka Komeleya Doktoran ê Dinya Dr. Jacqueline Kitolo, derheqê rewşa Xelatgira Nobelî Nêrgîz Mihemadî ya ke zîndanê rejîmê Îranî de ya, helwestê xo mojna.

 

Dr. Jacqueline Kitolo neql kerd ke bêparverdayîşê nêweşêk girewtişê çimdarîyê doktorî yê lazimî rewşanê winasî de, binpaykerdişêk eşkera yê heqê weşîye yo û cuya aye erzena tehlukeya cidî.

 

Sewbîna dîyar kerd ke ganî dewletî miqateyê nê çî bibê ke tepişteyî bi eynî sewîyeya çimdarîya weşîye ya kesanê asayî û bê tu cîyakerdişî, biresê dermankerdişî yê doktoran.

 

Dr. Jacqueline Kitolo veng da selahîyetdaranê Îranî ke girewtişê lezkî û bêsînorî yê çimdarîya doktorî semedê Nêrgîz Mihemadî bidê û va: “Ganî Nêrgîz Mihemadî berê nêweşxane û bi hacetanê baş hetê doktoranê pisporî ra bêro dermankerdiş.”

 

Erjê vatişî yo ke 1ê gulane de, Nêrgîz Mihemadî Zîndanê Zencanî de dimayê ke di reyan hişê xo ra şîya, krîzê qelbî vîyarna û bi lezkî berdî nêweşxaneyêk Zencanî. Roja 5ê gulane zî, avûkata Nêrgîz Mihemadî Şîrîn Erdekanî neql kerd ke cuya tepişteya sîyasîye Nêrgîz Mihemadî tehlukeyêk pîl de ya û nika keyeyê aye hewl dano aye bido ciwîyayîş.​​​​​​​​​​​​​​​​