Neslîhan Kardaş

 

ŞIRNEX - Dimayê zimistanê derg û bi varanî, wisar ame û Botan de wisar sey xoverdayîşê şarî newe ra gane bi.

 

Kurdistan de dimayê zimistanê wuşk û serdinî, bi ameyîşê wisarî xoza newe ra gane bîye. Wisaro ke na herra qedîme ya Kurdistanî de newe ra gane bîyo, sey tesîrê têkoşînê şarê kurdî yo ke xoza ser o aseno. Emser wisar sey hîkayeyêka ke pêwa heme zor û zehmetîyan têkoşînî ra fek nêverdana, aseno. Çarhetê Kurdistanî de xoza aya bîye û Botan de zî merdiman heyran verdana. Elo Dîno yo ke mîyanê qezaya Basa û qezaya Cizîrî ya Şirnexî de ca gêno, hîkayeya têkoşîn, xoverdayîş û tarîxî zî bi bêvengî qal keno.

 

Vengê mîlçikan

 

Elo Dîno de vengê mîlçikan qet kêm nêbeno û ayabîyayîşê xoza dir paştîdayîş danê xoverdayîşê xoza. Semedê varanê zafî, herre heme dewlemendîya xo pêşkêşê merdiman kena. Dimayê zimistanê dergî, Botan de koyî bîyî kewe û daran çîçegê rengînî akerdî.

 

Xoza reng bi reng xemilîya

 

Xoza bi çîçeganê rengînan û keskîye xemilîya. Her game de herre û awe newe ra yena hîskerdiş û rayîran de reng û vengê mîlçikan yeno hîskerdiş. Newalê ke qilê Cûdî ra heta Dîcle derg benê, merdiman bi rindekîya xo heyran verdenê. Her çîçegêk sey sembolê xoverdayîşî ya.