Elfazî Toral

 

STENBOL - Endama Meclîsê Cinîyan a DEM Partî Nazmîye Ulker dîyar kerd ke, pêwa ke serê vengdayîşê aştîye yê 27ê Sibata 2025î ra wext vîyarto zî hema zî gamêka somute nêameya eştiş û va: “Aktorêk hem sey muxatabê prosesî yeno vînayîş hem zî heto bîn ra yeno tecrîdkerdiş. Azadîya fîzîkî û statû ganî bibê rojeve. Ganî demêkê nêzdî de prosesê statûyî dest pêbikero.”

 

Prosesê Aştî û Cimatê Demokratîkî yo ke bi vengdayîşê Rayberê Şarê Kurdî Abdullah Ocalanî dest pêkerdo, dewam keno. Serê nê vengdayîşî de PKK’yî kongreya xo viraşte. PKK’yî serrgêra 12ine ya kongreya xo de eşkerakerdişêk da. Peyê na eşkerakerdişî serekê pêroyî yê MHP’yî Devlet Bahçelî qisey kerd û va ke ganî statûyê Abdullah Ocalanî bêro destpêkerdiş. Endama Meclîsê Cinîyan a Partîya Têduştî û Demokrasî ya Şaran (DEM Partî) Nazmîye Ulker derheqê prosesî de qisey kerd.

 

Nazmîye Ulker bale ant serê vengdayîşê ‘Aştî û Cimatê Demokratîkî’ û dîyar kerd ke pêwa ke serrêke û nîm vîyarto zî dewlete hema zî gamêka somute nêeşta û wina va: “Awankerdişê komîsyonî, pêvînayîşê komîsyonî bêguman muhîm û biqîymet o. Labelê komîsyon babeta komelîkerdişî de, şarî hînê prosesî kerdiş û kerdoxê prosesî kerdiş de, vurîyayîşê uslubê çapemenîye de qels mend. Labelê nê muhîm bî. Ganî proses bêro qalkerdiş. No zî ganî bi paştîdayîşê meclîs, komîsyon û çapemenîye biameyîne kerdene.”

 

‘AKP hewl dano prosesî bikero qurbanê weçînayîşî’

 

Nazmîye Ulker vatişî yê "Tirkîyaya bêteror" zî rexne kerde û wina eşkera kerd: “Pêwa ke têgêrayîşê azadîye çekî ronayî û peyser ancîya, semedê akerdişê rayîrê prosesî hewldayîşê neweyî bierzê zî, Tirkîya vera nê de hewldayîşêko pozîtîf nêmojna. Prosesî wextî ser o vila kerd. Wexto ke rapor ame pêşkêşkerdiş, va ke dimayê Remezanî. Labelê pey roşanî ra aşmêke vîyarîya. Aseno ke AKP wazeno mesele bikero qurbanê weçînayîşî.”

 

‘Ganî ware bêro akerdiş’

 

Nazmîye Ulker serê polîtîkayanê qeyûman zî vinderte û ard ziwan ke ganî îqtîdar şaredarîyanê Kurdîstanî teslîm bikero û polîtîkayanê qeyûman bivedarno. Nazmîye Ulker wina va: “Bi operasyonanê qeyûman demokrasî nêeşkeno bêro awankerdiş. Her kes semedê demokratîkbîyayîşê Tirkîya hewl dano, labelê ê nê hewldayîşan wextî ser o vila kenê û uslubê xo nêvurnenê, vanê "Tirkîyaya bêterore". Bi nê qiseyan kes nêreseno tu cayî.”

 

‘Ganî heqê hêvîye bikewo binê asayîşê qanûnê bingehînî’

 

Nazmîye Ulker destnîşan kerd ke Rayberê Şarê Kurdî Abdullah Ocalan muxatabê prosesî yo û nê çîyî ardî ziwan: “Aktorêk hem sey muxatabê prosesî yeno vînayîş, hem zî heto bîn ra yeno tecrîdkerdiş. Azadîya fîzîkî û statû ganî bibê rojeve. Ganî demêkê nêzdî de prosesê statûyî dest pêbikero. Ganî heqê hêvîye bikewo binê asayîşê qanûnê bingehînî. Devlet Bahçelî mesela her wext ano rojeva meclîsî. Gelo çira çîyê ke lazim ê nêyenê kerdene? Ma nê mereq kenê. Ganî demêkê nêzdî de û qetî azadîya fîzîkî ya Birêz Ocalanî û statûyî bîyarê rojeva xo.”