WAN - Hemsereka OHDyî Hatîce Bagci va ke proses bi polîtîkayê asayîşî yeno domnayîş û va ke aştîyêke manadar bi asayîşê huqûqî û azadîya Abdullah Ocalanî mumkin a. Hatîce Bagci wina va: “Eke proses bi aştîye peynî nêbo do Tirkîya sey Îran û Rojava bi tesîrê dewletanê emperyalî bikewo mîyanê şerî.”

 

Vengdayîşê “Aştî û Cimatê Demokratîk” ke Rayberê Şarê Kurdî Abdullah Ocalanî 27ê sibata 2025ine de kerd ser o yew serre vîyart la hema zî tecrîd dewam keno, statu nêameyo naskerdiş û dewlete goreyê ruhê prosesî game nêerzena. Pabebîyayîşê prosesî ra, azadîya fîzîkî ya Rayberê Şarê Kurdî Abdullah Ocalanî, şikinayîşê tecrîdî û asayîşê huqûqî yê.

 

Hemsereka Komeleya Huqûqnasanê Semedê Azadîye (OHD) ya Wanî Hatîce Bagci, derheqê prosesî de qisey kerd.

 

Hatîce Bagci va ke prosesî dir pabebîyayîşê şarî pê ame û çarçeweya nê de agahîyê zelal ê derheqê awankerdişê mutabakatî de nêameyî parekerdiş û va: “Têgêrayîşê Azadîya Kurdî û Rayberê Şarê Kurdî Abdullah Ocalanî gamanê cidî eştî. Semedê derûdorêk bêpêrodayîşî game eştî. Sey yew hetî gamê somut û muhîmî eştî. Nê sewîyeyî de munaqeşeyê ke ganî zemînêk huqûqî û demokratîkî bêro awankerdiş yenê kerdiş.”

 

‘Dewlete hema gamêke somut nêeşta’

 

Hatîce Bagci eşkera kerd ke pêwa ke Abdullah Ocalan û têgêrayîşê azadîye gamê cidî eştî, dewlete berpirsîyarîya xo bica nêarda, gamê ke bawerî danê şarî nêeşta û wina va: “Komîsyono ke meclîs de ame awankerdiş pabebîyayîş zî viraşt. Xebatî ameyî domnayîş. Sazî ameyî goşdarîkerdiş. Komîsyonî dir pabebîyayîşê şarî zî pîl bî. Komîsyon raporêk weşan kerd, ma nêeşkenê vajê ke wezîfeyê xo yê prosesî temam kerd. Komîsyon û rapor, nêeşkeno sey gamêk dewlete bêro ercnayîş. Dewlete teberê polîtîkayê asayîşî, problem zemînêk demokratîkî, huqûqî û adilane de çareser bikerdêne, bi rastî pêşnîyazîyanê somutî eştêne orte. Raporo ke ame pêşkêşkerdiş versîya polîtîkayê asayîşî de ameyî temamkerdiş. La polîtîkayê asayîşî aştî nêanê. Her gamê ke ameye eştiş semedê dewlete hetê çareserîya demokratîkî de firsetêk muhîm bi. La ma samîmîyet û ewnîyayîşê dewlete ya hemverê prosesî eşkenê mîyanê nê heme çîyan de munaqeşe bikerê. Eke ma bi aştîye bawer bikerê ganî gamanê somutî bierzê.”

 

‘Ganî semedê Birêz Ocalanî statu bêro naskerdiş’

 

Hatîce Bagci bale ant tecrîdê Abdullah Ocalan ser û na mesele de zî wina va: “Birêz Ocalan muxatabê esasî yê prosesî yo. La pêwa nê statuyê ci nêameyo naskerdiş û serrastkerdişêk nêameyo kerdiş. Semedo ke proses aver biherikîyo ganî zemînêk muzakereyî yê mîyanê têduştîyan de bêro awankerdiş. Şertê tecrîdî de munaqeşeyêk rind zî nêeşkeno bêro domnayîş. Tirkîya demokratîkbîyayîş biwazo ganî game bierzo, ganî qerarê DHMEyî pê bîyaro. Ganî nêweşê tepişteyî û tepişteyê sîyasî bêrê veradayîş. Averşîyayîşê Rojhelatê Mîyanênî, aştîye mecburî kenê. Eke proses bi aştîye peynî nêbo do Tirkîya sey Îran û Rojava bi tesîrê dewletanê emperyalî bikewo mîyanê şerî.”