WAN - Nuştoxa kurde Elîf Gemîcîoglu Yavîç derheqê bidestkerdişê statuyê kurdî de ercnayîş kerd û wina va: “Semedê entegrasyonê ganî ziwanê dayîke bibo ziwanê fermî. Perwerdeyê bi ziwanê dayîke yew heqê sereke yo. Eger dewlete cidî bo, ganî kurdkî, pêşdibistane ra heta zanîngehe bibo ziwanê perwerdeyî.”

 

Goreyê îstatîstîkan dinya de 7 hezarî zêdeyêr ziwanê cîya yenê qiseykerdiş. Nê ziwanan ra sera 40 çinbîyayîşî dir rî bi rî yê. Çarçeweya 21ê Sibate Roja Ziwanê Dayîke ya Dinya de, Kurdistan de waştişê ke ziwanê kurdkî bibo ziwanê fermî û perwerdeyî vejîya orte. Semedo ke ziwanê kurdkî ke bi mîlyonan kesî qisey kenê labelê hîna statu bidest nêkerdê û binê tehlukeyê çinbîyayîşî de yo, bibo ziwanê fermî xebate û kampanyayî yenê domnayene.

 

Nuştoxa kurde Elîf Gemîcîoglu Yavîç derheqê bidestkerdişê statuya kurdkî û bibo ziwanê fermî û perwerdeyî de ercnayîş kerd.

 

‘Ziwanê ke ziwanê perwerdeyî nêbo çin o’

 

Elîf Gemîcîoglu da zanayîş ke ganî sere de ziwanê kurdkî tu ziwanî binê serdestî de bê û ganî heme ziwanî azad bê. Elîf Gemîcîoglu wina va: “Bi seserran o semedo kurdkî wayîrê statu bo têkoşîn yeno domnayene. Rayberê Şarê Kurdî Abdullah Ocalanî prosesê aştî û cimatê demokratîkî dest pêkerd. No proses prosesê bînî ra cîya bî û cidî ame girewtiş. Labelê gamê semedê ziwanî qîm nêkenê. Akerdişê dersê weçînite û lîsans qîm nêkeno. Dewleta ke wazena destûrê bingehînê demokratîk vejo, cuyayîşê demokratîkî awan bikero ganî babeta ziwanî de nakokîyan nêciwîyo. Ganî dewlete bizano ke wextê ziwanêk ziwanê perwerdeyî nêbo binê tehlukeyê çinbîyayîşî de maneni. No zî bawerîya kurdan prosesî ser o qels kena.”

 

‘Eger dewlete cidî bo ganî kurdkî bibo ziwanê perwerdeyî’

 

Elîf Gemîcîoglu eşkera kerd ke ziwanê kurdkî ziwanêk qedîm o û va: “Ganî ziwan dersê weçînite ra vejîyo. Tutî na babete de probleman biciwîyê. Ziwanê ke ziwanê perwerdeyî nêbo tu wext nêeşkeno lingan ser o bimano. Şarê Kurdî bi serran o wayîrê ziwanê xo vejênê û hîna nameyê kurdkî nîno qebûlkerdiş. Eger dewlete cidî bo ganî ewil kurdkî bikero ziwanê perwerdeyî. Gamî semedê kurdkî bêrê eştiş do bawerîya şarê kurdî bi prosesê zî zêde bikero. Alternatîfêk bîn çin o. Na rewşe aramîya cimatî zêde kena. Proses pozîtîf aver bêro do feydeyê ci tenya semedê kurdan çin bo, Tirkî zî feydeyê ci vînenê. Perwerdeyê bi ziwanê dayîke heqê tewr esasî yê şaran o.”

 

Elîf Gemîcîoglu wina peynî ard: “Tutê kurdî bi ziwanê xo pîl benê. Dimayê destpêkerdişê dibistane, tirkî kewena cuyayîşê înan. Semedê nê zehmetîyan ciwîyenê. Prosesê musayîşê înan tewr tay 5 serran o. Nê semedî ra tutî xo rehet hîs nêkenê. Tutî ra heqê tutanê kurdan dest ra yeno girewtiş. Eger ewro behsê entegrasyonêk bêro kerdiş, heqê tutanê tirkan çi bo ganî yê kurdan zî o bo. Ganî têduştî bo. Nê semedî ra perwerdeyê bi ziwanê kurdkî pêşdibistane ra heta zanîngehe ferz o.”