MERKEZÊ XEBERAN – Goreyê HRANA’yî heta nika 7 hezar û 15 kesî ameyî qetilkerdiş û 26 hezar kesî zî birîndar bîyî.

 

Ajansê Xeberan ê Çalakîkeranê Heqê Merdiman (HRANA) derheqê bîlançoyê peyên protestoyanê Rojhelatê Kurdistan û Îranî raporêk vila kerd.

 

HRANA neql kerd ke destpêkê protestoyanê Rojhelatê Kurdistanî û Îranî de 7 hezar û 15 kesî ameyî qetilkerdiş û 53 hezar û 552 çalakîkerî ameyî destbendkerdiş, sewbîna 25 hezar û 845 çalakîkerî birîndar bîyê.

 

Goreyê raporî mîyanê kesê ameyî qetilkerdiş de 6 hezar û 508 çalakîker, 226 tutî û 67 welatiyê ke beşdarê protestoyan nebîyê est ê, sewbîna 214 endamê hêzê girêdayeyê rejîmê Îranî zî ameyî qetilkerdiş.

 

HRANA da zanayîş ke destpêkê protestoyan de 144 wendekarê zanîngehe ameyê destbendkerdiş, 11 hezar û 53 kesî semedê cipersayîşî semedê dezgehê rejîmê Îranî ameyî vengdayîş. Sewbîna 355 çalakîkerî bi zorî mecbûrê îtîrafî ameyê kerdiş.