Rozerîn Gultekîn

 

WAN - Necla Gursoy da zanayîş ke semedê bajarê cinîyan xebatê herêmê pîlotî dewam kenê û va: “Bajaran de getobîyayîş est o. Nê semedî ra têkoşînêk topyekûn lazim o. Xoresnayîşê cinîyan ê merkezê piştîdayîşî, îstîhdam û asayîşî waştişê esas o.”

 

Şaredarîyê Partîya Têduştî û Demokrasîyê Şaran (DEM Partî) 20ê Kanûna 2025ine de bi kombîyayîşêk ke pê ardî de bajarê Amed, Nisêbîn, Gever, Artemêt û Cizîrî sey “bajarê cinîyan” îlan kerdî. Bi nê bajarê cinîyan cuyayîşêke têduşt, azad û asayîş semedê cinîyan yeno hedefkerdiş.

 

Midûra Polîtîkayê Cinîyan a Yewîya Şaredarîyê Herêmê Başurê Rojhelatê Anatolyayî (GABB) Necla Gursoy derheqê armancê “bajarê cinîyan” û xebatê yenê domnayene qisey kerd.

 

Tesîrê tecrubeyê serran: Bajarê cinîyan

 

Necla Gursoy da zanayîş ke sey îdarekarîyê herêmî bi perspektîfê demokratîk, ekolojîk û azadîya cinîyan xebatan domnenê û va îdarekarîyê herêmî hetê ke îradeyê cinîyan vejîyo orte û xo îdare bikerê de xeylêk muhîm o. Necla Gursoy wina va: “Nê semedî ra zî hewldayîşê awankerdişê bajarê cinîyan nimûneyê tewr girdî yo. Bajarê cinîyan rengê cinîyan bigirê heta vurnayîşî û heta heme wareyî ci cinî bibê. Nê semedî ra bajarî ameyî dîyarkerdiş û xebatî yenê domnayene. Na xebatêka newe nîya; verê zî xebate ameye domnayene û no tesîrê tecrubeyê serran o. 5 herêmê pîlotî ameyî weçînayîş. Amed, Nisêbîn, Cizîr, Gever û Artemêt. Nê xebatî do bibê modelêk nimûne.”

 

‘Hemverê getobîyayîşî têkoşînêk hempar’

 

Necla Gursoy dîyar kerd ke roja ke deklerasyon ame eşkerayîkerdiş heta nika xebatê xo dewam kenê û va bajaran de feqîro beno sebebê giranbîyayîşê şerê taybetî û wina dîyar kerd: “Ma hemverê nê semedê zêdekirdişê îstîhdamê cinîyan xebatan domnenê. Îmar ra heta parkan, kreşê tutan heta wareyê îstîhdamê cinîyan, heta asayîşî, xebatê ma dewam kenê. Semedê vernîgirewtişê şîdetê cinîyan ser, semedê awankerdişê merkezê piştîdayîşê cinîyan, mekanîzmayê vernîya şîdetî gênê xebatê ma dewam kenê. Hemverê fuhuş û tiryakî de xebatê ma dewam kenê. ‘Platforma Şiyar Be’ yê hemverê tiryakî ame awankerdiş est o. Ma pîya xebatan domnenê. Bajar de getobîyayîş est o. Nê semedî ra têkoşînêk hempar lazim o. Ganî cimatî de refleks bêro awankerdiş.”

 

Hewcedarîyê cinîyan çi yo?

 

Necla Gursoy derheqê bendewarî û hewcedarîyê cinîyan de zî qisey kerd û wina dewam kerd: “Artemêt, Gever, Nisêbînî xebatî yenê kerdiş. Ma serê babetê ke cinî xo senî rehet hîs kenê vindenê. Ma waştiş û hewcedarîyê cinîyan ser o xebatan domnenê. Waştişî yenê girewtiş û raporî yenê amadekerdiş. Komîsyonî yenê awankerdiş û bi nê komîsyonan xebatî yenê domnayene. Xebatê ma do hîna zêdeyêr xurt bibê û dewam bikerê.”