MERKEZÊ XEBERAN – Merdimê vînîbîyayeyan Amed, Êlih û Colemêrg de çalakî organîze kerdî û waştişê muhakemekerdişê kerdoxê Mehdî Akdenîz, Metîn Can, Hasan Kaya û Cuneyt Aydinlarî kerdî.

 

Komeleya Heqê Merdiman (ÎHD) û merdimê vînîbîyayeyan Amed, Êlih û Colemêrg de çalakî organîze kerdî û waştî ke kerdoxê Mehdî Akdenîz, Metîn Can, Hasan Kaya û Cuneyt Aydinlar bêrê muhakemekerdiş.

 

Amed

 

Şubeyê Amedî yê ÎHD’yî û merdimê vînîbîyayeyan hewteyê 888ine de çalakîya xo ya bi sloganê “wa vînîbîyayeyî bêrê dîyayene û faîlî bêrê muhakemekerdiş” domnayî. Çalakî verê Vîrdarîyê Heqê Merdiman ê Parkê Koşuyolu yê qezaya Rezanî de ame organîzekerdiş. Xeylêk kesî beşdarî çalakî bîyî. Çalakîye de pankartê ke fotografê kesê ameyê vînîkerdiş û qetilkerdiş ser de bî, ameyî akerdiş.

 

Çalakîya no hewte de hîkayeyê Mehmet Mehdî Akdenîzî ame wendiş ke 20ê Sibata 1994ine de qezaya Pasûrî ya Amedî de ame destbendkerdiş û êdî agahî ci ra nêamî girewtiş.

 

Êlih

 

Êlih de zî çalakîya ÎHD û merdimê vînîbîyayeyan hewteyê 724ine de verê Vîrdarîyê Heqê Merdiman ê Cadeyê Gulistanî de dewam kerd. Çalakî de aqûbetê Serekê Şubeyê ÎHD’yî yê Xarpêtî avûkat Metîn Can û endamê awankerdox Dr. Hasan Kaya ame perskerdiş ke 32 serrî verê keyeyê xo ra ameyî remnayîş û dima ra ameyî qetilkerdiş.

 

Colemêrg

 

Çalakîya qezaya Geverî ya Colemêrgî de hewteyê 214ine de dewam kerd. Çalakî Kuçeyê Hunerî de fotografê kesê destbendkerdişî de ameyî vînîkerdiş ameyî wedaritiş. Çalakîya nê hewteyî de aqûbetê Cuneyt Aydinlar ame persayîş ke 20ê Sibata 1994ine de ame qetilkerdiş. Hemserekê Şubeyê Colemêrgî yê ÎHD’ê Ozan Akbaş eşkerayîye wend.

 

Eşkerayîye bi çalakîya roniştişî peynî bî.