MERKEZÊ XEBERAN – Tepişteya nêweşe Besra Erol a 66 serrî ya ke veradayîşê aye amebî astengkerdiş, Zîndanê Xarpêtî ra ameye veradayîş.

 

Besra Erol a 66 serrî ke 30ê Nîsana 2019ine de semedê qiseykerdişê gorê lajê xo Evrîm Denîz ke 20ê Temmuze 2015ine de qezaya Pirsûsî ya Rihayî de hêrişê DAIŞî de ame qetilkerdiş, bi îdiaya “endamîya rêxistine” ameye tepiştiş û 7 serrî û 5 aşmî cezaya zîndanî ci rê ameye birnayîş.

 

Tepişteya nêweşe Besra Erol ke Zîndanê Xarpêtî de ameye tepiştiş, ganî 9ê Kanûna 2024ine de biameyîne veradayîş, labelê bi sebebê “cezaya dîsîplînî” hetê Heyetê Îdare û Çimdarîyê Zîndanî veradayîşê aye serrêke ame taloqkerdiş.

 

Dimayê îtirazê qerarê Heyetê Îdare û Çimdarî, qerar aşmêke dima ame betalkerdiş. Labelê heyet bi qerarê neweyî, veradayîşê Besra Erole 6 aşmî bînî taloq kerd. Dimayê 6 aşmî heyet ancî 6 aşmê bînî veradayîşê aye taloq kerd.

 

Besra Erol ewro reyke bîn şî heyet û ameye veradayîş. Besra Erol verê zîndanî de hetê merdimanê xo ra ameye pêşwazîkerdiş û ver bi bajarê xo Mûşî de kewte rayîr.