Rojda Aydin - Neslîhan Kardaş

 

MÊRDÎN - Cinîyê Qoserî ke reaksîyon vera hêrişê Rojawanî ser o mojnayî, dîyar kerdî ke heme dewletê mîyanneteweyî piştîdayîşê DAIŞî kenê. Cinîyan venga yewîye heme kurdan rê kerdî.

 

Hêrişê HTŞ’yî û komê Tirkîya ke bi rojano hemverê Rojawanî de dayî destpêkerdiş dewam kenê. Hemverê nê hêrişan de her çar parçeyê Kurdistanî, Tirkîya û zaf cayanê dinya nêrazîbîyayîşî her ke şinê zêde benê.

 

Cinîyê qezaya Qoserî ya Mêrdînî zî reaksîyon vera hêrişan mojnayî û venga yewîye kerdî.

 

‘Ma aştîya bi rûmet wazenê’

 

Kadrîye Bahçivanci ewilî reaksîyon vera hêrişê Rojawanî ser o mojnayî û wina qisey kerd: “Ma wazenê no şero lêşin mîyanê kurdan de wurzo. Zilmo ke Rojawan de yeno kerdiş ma qebûl nêkenê. Ma kurdî yew ê. Ma ça bê zî ma do piştê Rojawanî de bê. Çi destê ma ra bêro ma do bikerê. Ganî tu kes piştê DAIŞî nêgîro. Zîhnîyetê lêşin ê DAIŞî ewro Rojawan de bi wehşetêk gird merdiman qetil keno. Ganî heme dinya piştê kurdan bikerê û wurzê lingan ser. Tirkîya hetêk ra vana aştîye û heto bîn ra hêrişê Rojawanî kena. Ganî dewleta tirke nê şerî bido vindarnayîş. Aştî yewhet nêbena. Nê semedî ra zî ganî ewilî no şer bido vindarnayîş. Ma aştîya bi rûmet wazenê.”

 

‘Hetêk proses, heto bîn ra şer…’

 

Fatîme Bûmînî zî hêrişê DAIŞî sey hovîtî pênase kerd û wina dewam kerd: “Ma nê hovîtî şermezar kenê. Semedê aştîye prosesêk dest pêkerd. Labelê semedê hêrişan bawerîya tu kesî bi prosesî nîna. Semedo ke proses bi nê hawayî nîno domnayene. Sewbîna lezkî nê hêrişî Rojawan ser o ganî bêrê vindarnayîş. Dewletê mîyanneteweyî heme bîyê yew piştîdayîşê DAIŞî kenê û hêrişê kurdan kenê. Ma nê nêzdîbîyayîşî û zûran qebûl nêkenê. Ma hêvî kenê ke no wehşet şarê kurdî ser o wurzo. Şarê kurdî tena nîyo, ma piştê înan de yê. Ma silamê xo heme kesê ke uca de yê şirawenê.”

 

Venga yewîye

 

Fatîme Bûmînî bale ant Berê Sêmalka û venga KDP’yî kerd ke berê uca her tim akerde verdo û wina dewam kerd: “Wa nê berî wedarnê. Ma nê sînorî mabêne xo de wurznê. Ma şarê kurdî heme yew yê, sînoran nas nêkenê. KDP zî ganî her game hetê kurdan de vindero. Ganî kurdî her tim yew bê. Ma yewîya xo awan bikerê. Ganî KDP zî pêşmergeyê xo bişirawo Rojawan semedê hetkarî. Kurdistan heme girêdayeyê nê berî yo. Heta destê ma ra bêro ma do piştîdayîşê uca bikerê.”

 

‘Xeta ma yew a’

 

Tenzîle Agatay tewr peynî wina va: “Ewro şarê Rojawanî û heme şervanî serdî de xo ver danê. Ma zî semedê piştîdayîşî ewro wareyan de yê. Ganî şarê ma zî nêvajo serdo, wa heme vejîyê wareyan. Ma nêvajê tutî, ciwanî, kal û pîr ê. 7 serre ra heta 70 serre heme kesî vejîyayî kuçeyan. Ma ewro gilanê tutanê xo mûnenê semedo ke gilaya cinîyan ke ameya birnayîş. Eke lazim bibo ma do tutê xo zî nê rayîrî de feda bikerê. Ma kurdî yew ê, her çar parçeyê Kurdistanî heme yew o. Xeta ma yew a. Ma do nêvajê vewre û varan o ware de bê. Ez xoverdayîşê Rojawanî pîroz kena.”