Buşra Turan

 

WAN - Gonul Uzunaya DBPyîje da zanayîş ke têkoşînê şarê kurdî esasê prosesê “Aştî û cimatê demokratîkî” awan kerdo û hêrişê hemverê Rojawanî hemverê prosesî yo. Gonul Uzunay da zanayîş ke semedê proses baş bidomîyo ganî azadîya fîzîkî ya Abdullah Ocalanî bêro caardiş.

 

Hêrişê çeteyê HTŞ’yî yê girêdayeyê Hukmatê Demkî yê Sûrîye ke 6ê çeleyî de hemverê taxanê Şêxmeqsûd û Eşrefîye yê Helebî dest pêkerdî dewam kenê. Her çar parçeyê Kurdistan û Ewropayî de xoverdayîşê hemverê hêrişan dewam keno. Reaksîyonê hemverê hêrişan dewam keno û her çar parçeyê Kurdistanî ra şar herikîyeno sînorê Rojawanî. Hetê Îdarekarîya Xoserî ya Vakur û Rojhelatê Sûrîye ra venga seferberî ame kerdiş.

 

Hemsereka Partîya Herêmanê Demokratîkan (DBP) ya Wanî Gonul Uzunay hêrişê hemverê Rojawanî û proseso domîyeno de qisey kerd.

 

‘No proses netîceyê xoverdayîşî yo’

 

Gonul Uzunay dîyar kerd ke şarê kurdî bi serran o semedê nasname û heqê xo têkoşîn keno û va: “Bi serran o pêwa qetlîam û qirkerdişê şarê kurdî dest waştiş, nasname û ziwanê xo vera nêda. Kurdî her çiqas çar parçeyan ameyê visnayîş zî têkoşînê xo her cayê dinya de domnayî. No têkoşîn tenya semedê şarê ma nê, semedê heme şarê bindestî ame domnayîş. Ma ewro behsê prosesêk kenê no bi xêrê têkoşîno ameyo dayîş pê ame.”

 

‘Ganî azadîya fîzîkî ya Abdullah Ocalanî bêro caardiş’

 

Gonul Uzunay wina dewam kerd: “Modelê Rojawanî ame awankerdiş semedê aştî û demokrasî alternatîfêk rast bî. Belê beno ke ewro hêrişî hemverê nê modelî est ê, beno ke ziyan est o. Labelê na paradîgma do sey heqîqetêk alternatîf bîyayîşê xo bipawo. Ganî nika cimat, cinî, ciwan û roşnvîrî Birêz Ocalan dir bêrê têhet û fikrê ey munaqeşe bikerê. Nê semedî ra zî ganî azadîya fîzîkî ya Abdullah Ocalanî bêro caardiş.”

 

‘Ganî Tirkîya dest polîtîkayanê xo ra verabido’

 

Gonul Uzunay wina peynîya qiseykerdişê xo ard: “Sere de şarê kurd, durzî, elewî, suryanî û heme şarê Rojawanî qirkerdişî dir rî bi rî mendî. Paradîgmaya Abdullah Ocalanî xeta azadî û demokrasî awan kena. Alternatîfêk rast a. Ma behsê prosesê aştî û cimatê demokratîkî kenê. Na serrêke ya dewam kena. Labelê Rojawan de hêrişî dewam kenê. Ganî Tirkîya dest polîtîkayê ke rayîr danê Şamî verabido. Ganî piştîdayîşê çeteyan verabido. Wezîfeyê ke kewenê cimatî ser o estê ke dorê venga ‘aştî û cimatê demokratîkî’ de bibê yew û ameyoxê merdimîye bêro pawitiş.”