Melek Avci

 

ANQARA - Cinî 10ê çeleyî de hemverê polîtîkayanê dişminîyê cinîyan ê îqtîdarî semedo ke vengê xo berz bikerê mîtîng de yenê têhet. Pêkameyî dîyar kerdî ke semedê qerardarîya rêxistinbîyayîşê cinîyan, semedê cuya têduşt û heqê cuyayîşî zaf muhîm o.

 

Anqara de bi vengdayîşê hempar yê 37 sazgehê cinîyan do 10ê çeleyî de Meydanê Tandoganî de mîtîngê ‘Semedê heqî, cuye û azadîye mîtîngê girdî yê cinîyan’ virazê. Cinî do hemverê polîtîkayanê dişminîyê cinîyan, feqîrîya cinî û aştî-azadîye, xespkerdişê heqan, qetilkerdiş û şîdetê cinîyan ser o meydanan de bibê.

 

Cinîyî derheqê armancê mîtîngî de qisey kerdî.

 

Têgêrayîşê Femînîstî yê Çepî Fatoş Eroglu dîyar kerd ke ê hemverê her tewir hêrişanê cinîyan ser o mîtîng virazenê û wina va: “Cînayet û şîdetê cinîyan ser her cayî de zêde benê. Xêrcê nînan hemverê heqê cinîyan hêrişê cidî est ê û derheqê nê de qanûnî yenê amadekerdiş. Ma do hemverê nê polîtîkayan de meydanan de bimanê.”

 

‘Ma fek heqê xo ra veranêdanê’

 

Fatoş Eroglu eşkera kerd ke ê do hemverê sîstemê dişminîyê hemverê cinîyan meydanan de bibê û nê çî va: “Heto bîn ra bi destê dîyanetî derheqê heq û şiklê cuyayîşê cinîyan de xutbe yenê dayîş. Bi nê caardişan cuye, cil û belgê cinîyan yenê sînorkerdiş. Îqtîdarê AKPî rolan ma rê ferz keno. Ma cinîyê ke bi serran têkoşîn kenê fek heqê xo ra veranêdanê. Ma hewldayîşê ke cinîyan sey hêzê qijî yê karî vînenê qebûl nêkenê. Ma semedê heqê xo yê têduştî têkoşîn kenê. Ma pêro cinîyan dawetê meydanê Tandoganî kenê. Şîdet û desteştişê cinîyan ser sînor derbaz kenê. Hemverê sucanê cinîyan polîtîkaya bêcezakerdişî yena domnayene. Ma do hemverê nê hêrişan de her cayî vengê xo yew bikerê û têkoşînê rêxistinkerde bidomnê.”

 

‘Heqê cinîyan yenê çinkerdiş’

 

Sereka Komeleya Cinîyan a 29 Ekîme Şenal Sarihan zî fikrê xo ard ziwan û dîyar kerd ke ê semedê heqê tewr bingehî yê merdimîye yê cinîyan têkoşîn kenê û wina va: “Demê peyênan de bi tesîrê fehmê îqtîdarî hewl yenê dayîş cinî hepsê keye bibê, cuya cimatî ra bêrê visnayîş. No problemêko gird o. Labelê problemo tewr gird no yo ke heqê cinîyan çin ameyo hesibnayîş. Aşmêke de 20-25 cinî hetê camêrdan ra yenê qetilkerdiş. Ma do hemverê nê hêrişan de meydanan de vengê xo berz bikerê. Ma venga pêro cinîyan danê ke semedê heqê xo 10ê çeleyî de meydanê Tandoganî de bibê.”

 

Pêkameyê mîtîngî

 

Tumbelsen, Komeleya Cinîyan a 29 Ekîme, Meclîsê Cinîyan ê Federasyonê Elewî Bektaşî, Komeleya Kulturê Elewî, Merkezê Heqê Cinîyan ê Baroyê Anqarayî, Merkezê Heqê LGBTÎ ê Baroyê Anqarayî, Komîsyonê Mobîng û Bêtêduştî ya Cinsî ya ASMMMO, Komeleya Têduştî û Têkoşînê Hemverê Bêtêduştî, Komeleya Zerrîwazanê Başkentî, Komeleya Destmede, Rayîrşîyayîşê Cinîyan ê Dinya, Komeleya Cuya Têduşte, Koma Xebata Cinîyan a Xebatkaranê Keye, Federasyona Heqê Astengdaran, Komeleya Haci Bektaşî, Komeleya Perwerdeyî û Kulturî ya Haci Bektaşî, Platforma Ma Qetilkerdişê Cinîyan Rawestênê, Komeleya Xebatanê Cinîyan, Weqfê Piştîdayîşê Cinîyan, Komeleya Cinî û Têkoşînî, KAOS-GL-KASAÎD, Komeleya Cigêrayîşê Cuya Cimatî ya Cinîyan, Meclîsê Cinîyan ê KESKî, Komeleya Cinîyanê Muhendis û Mîmaran, Yewîya Mulkiyetî, Meclîsê Cinîyan ê Komeleya Kulturê Pîr Sultan Abdalî, Meclîsê Taxe ya Seyranbaglari, Têgêrayîşê Çepî yê Femînîstî, Komeleya Avûkatanê Sosyal Demokrat, TJA, Yewîya Cinîyanê Tirkan, Yewîya Tabîbanê Tirkan, Komeleya Cinîyanê Zanîngehanê Tirkan, Federasyonê Komeleyanê Cinîyanê Tirkîya, Weqfê Uçan Supurge, Meclîsê Cinîyan ê Konseya Bajarî ya Yenîmahale.