MERKEZÊ XEBERAN - Selahîyetdaranê Îranî waştişê Xelatgirewtoxa Aştîye ya Nobelî ya 2023ine û pawitoxa heqê merdiman Nêrgiz Mihemedî ya semedê dermankerdişê xoser, red kerd.

 

Keyeyê aye neql kerd ke Nêrgiz Mihemedî hewteyê vîyarte de demo ke ameye destbendkerdiş, polîsan bi copan da aye ro û rî û qirrike aye mor bîyo.

 

Nêrgiz Mihemedî ya 53 serrî demo ke Meşhed de merasîmê yadkerdişê avûkat Hosrow Elî Kurdî ke bi hawayêko gumanbar dinyaya xo bedelnaye de qisey kerdbî û dima ra aktîvîstanê bînan dir ameye destbendkerdiş.

 

Keyeyê aye û komîteya piştdayîşî dîyar kenê ke demê destbendkerdişî de şîdet ameyo caardiş. Nêrgiz Mihemedî têlefon de bi kilmî neql kerde ke sereyê xo û qirrika xo ra darbeyê giranî werdê û 2 rey berdîyaya servîsê lezgînî.

 

Mêrdeyê aye Taghi Rahmani û keyeyê aye dîyar kerd ke înan endîşe kenê ke Nêrgiz Mihemedî ça û bi kam ci şertan de yena tepiştiş.

 

Amnesty International zî hêzanê asayîşî sucdar kerd ke hemverê Nêrgiz Mihemedî û aktîvîstêka bîne a cinî îşkence û muameleyê xirab kerd.

 

Selahîyetdaranê Îranî neql kerd ke demê merasîmê yadkerdişî de 39 merdimî ameyê destbendkerdiş, goreyê avûkatê keyeyî bi kêmî 50 merdimî bi hawayêko keyfî tepişte yê. Ame zanayene ke Nêrgiz Mihemedî bi “hemkarîya dewleta Îsraîlî” dir yena sucdarkerdiş.

 

Piştîdayîşê aye plan kenê ke rojanê bêro de semedê tedayanê sîstematîkan ê Îranî, muracatê Dozgerîya Dadgeha Cezaya Mîyanneteweyî bikerê.