Semra Turan-Pelşîn Çetinkaya

 

DÊRSIM – Hemsereka Dêrsimî Bîrsen Orhan ya ke qeyûm cayê aye de ame tayînkerdiş dîyar kerd ke qeyûm destkewtişê cinîyan hedef girewt û tewr peynî zî desturê reglî bêsebeb betal kerd. Bîrsen Orhan va, qeyûm tu xizmet nêkeno, problemî giranêr keno.

 

22ê teşrîna peyêne 2024ine de qeyûm tayînê Şaredarîya DEM Partî ya Dêrsimî ame kerdene. Qeyûm senî ame xebata cinîyan hedef girewt û heme xebatan vindarna. Pêwa nê zî xebatê qeyûmî serdanê keyeyan û esnafan ra wetayêr nîyê, xebatê semedê çareserîya problemê şarî vindarna.

 

Serrêke dimayê qeyûmî

 

Hemsereka Dêrsimî Bîrsen Orhan ya ke qeyûm cayê aye de ame tayînkerdiş dîyar kerde ke bi qeyûman mudaxele û xespkerdişê îradeyê şarî ame kerdene û her cayê bajarî binê nameyê asayîşî de yeno taqîbkerdene û binê tecrîdî de yo. Bîrsen Orhan va, 22ê teşrîna peyêne 2024ine de îradeyê şarî ame xespkerdene û va, a roje şar wayîrê îradeyê xo vecîya û xoverdayîş kerd.

 

‘Hemverê heme tewirê rijnayîşî ganî xizmet bêro kerdene’

 

Bîrsen Orhan dîyar kerd ke qeyûm senî ame, xebatê semedê feydeyê şarî hedef girewt û va: “Şar demo ke nê mesûlîyetî da ma, xêrcê komkerdişê çopî, pakitîya rûtîn, xebatê awe û kanalîzasyonî, çareserîya problemê komelî zî da serê ma. Hemverê rijnayîşî mesûlîyetê wina sey mojnayîşê reaksîyonî û vindarnayîşî dayî. Semedê nê zihnîyetê şaredarîya DEM Partî heme waran de xizmet domînaye.”

 

Destkewtişê cinîyan hedef girewt

 

Bîrsen Orhan dîyar kerd ke qeyûman rasterast mudaxaleyê kulturê şarî û cuye kerd û va: “Senî ame kursê ziwanî girewt. Koroya cinîyan girewt. Koroya cinîyan wareyê xebatanê cinîyan de zaf muhîm bî. Qeyûmî hemverê kultura ma de nêzdîbîyayîşêk dişminî mojna. Tewr peynî desturê reglî betal kerd. Bankaya cilan wedarit. Welatijê ke lazimîyê înan estbî, nê ra feyde girewtêne. Xeylê kesî rê teqawidbîyayîş ferz kerd. Xeylê kesî kar ra ameyî eştiş. Qeyûm tu xizmet nêkeno, problemî giranêr keno.”