AMED – Tutê ke Kreş û Keyeyê Ewnîyayîşî yê Zarokistanê Xalxalok û Zarokistanê Perperikî ke girêdayê Mudirîya Karê Kulturî û Komelî yê Şaredarîya Peyasî de perwerdeyê zafziwanî gênê, tewrê rayîrşîyayîşêko xozayî yê bêhempa bîy. Na çalakî Baxçeyê Hevselî yê tarîxî ke Lîsteya Mîrasê Dinya ya UNESCOyî de ca girewta de ame organîzekerdiş û armancê ci nê bî ke tutî bi rayîrê dîyayîş û tecrûbeyê rasterastan bimusê.

 

Nê rayîrşîyayîşî de tutan bi hawayêko rasterast xoza dir têkilî dayî ro, ekosîstemê dewlemend ê Baxçeyê Hevselî nêzdî ra dîy, vîrardişê dorê xo girewtî û hişmendîyê xo yê dorî bi hawayêko kûr xurt kerdî.

 

Muhîmîya musayîşê bi tecrûbe

 

Na cografyaya kan a Baxçeyê Hevselî ke erd, awe û cuye bi hawayêko xozayî yewbînan rê girêdayeyê, tutan fehm kerd ke pawitişê xoza bi rasti pawitişê ameyoxî yo.

 

Beyanato ke hetê raywanan ra ame dayene de muhîmîya çalakîye bi vatişê, “Ewro her gama ke yena eştene, semedê ameyoxî gamêka kesk a” ame dîyarkerdiş ke muhîm o tutî emrê qijî ra bi heskerdişê xoza û hişmendîyê pawitişî de aver şêrê.

 

Sewbîna ame neqlkerdene ke çalakîyê winasî tena hetkarîya averşîyayîşê akademîkî yê tutan nêkenê, eynî demî de hişmendîyê înan yê komelî û dore zî hîrayîn û xurtêr kenê.