AMED - Şaredarîya Amedî ya Bajarê Girdî çarçeweya çalakîyanê 8ê Adare de bazarê Çermûg û Erxenî û Sûr de rotixê cinîyan dir kom bî. Broşûrê bi hîrê ziwanan ameyî vilakerdiş û waştiş û pêşnîyazîyê cinîyan ameyî goşdarîkerdiş.

 

Şaredarîya Amedî ya Bajarê Girdî çarçeweya pîrozkerdişê 8ê Adare Roja Cinîyan a Dinya de cayê bazarî yê qezayanê Çermûg û Erxenî de cinîyan dir kom bî. Çalakîya ke hetê Daîreya Polîtîkayê Cinîyan ameye organîzekerdiş de broşûrê agahdarkerdişê heqê cinîyan ameyî vilakerdiş, qezaya Sûrî de zî Hemşaredara Amedî Serra Bucak û kesê ke aye reyde bî serdayîşê rotoxê cinîyan kerd.

 

Qezayan de pêvînayîşê bazarî

 

Çermûg û Erxenî de bazarê cinîyan de kombîyayîş ame organîzekerdiş û broşûrî ameyî vilakerdiş. Temsîlkarê Beşê Polîtîkayê Cinîyan û endamê meclîsî beşdarê çalakîya Çermûgî bî. Cinîyê bazarî paşxane yê tarîxî yê 8ê Adare, eysayîşê keda cinîyan û muhîmîyê têkoşînê semedê heqî ameyî agahdarkerdiş.

 

Erxenî de Hemşaredara qeza Birsen Azak Bayar, endamê meclîsî û karmendê Beşê Polîtîkayê Cinîyan û Şaxa Polîtîkayê Cinîyan beşdar bîyî. Broşûrî cinîyanê bazarî rê ameyî vilakerdiş û dîyar kerdî ke 8ê Adare tenya roja vîrardişî nîya, labelê roja têkoşînê mîyanneteweyî ya semedê berzkerdişê waştişê têduştî û azadî.

 

Sûr de serdayîşê esnafan

 

Çalakîyê ke hetê Serekîya Daîreya Polîtîkayê Cinîyan ra semedê 8ê Adare Roja Cinîyan a Dinya ameyî organîzekerdiş, dewam kenê. Hemşaredara Amedî ya Bajarê Girdî Serra Bucak, pêwa Hemşaredara Sûrî Fatma Gulan Onkol, endamê meclîsê DBB’yî, Hetkara Sekreterê Pêroyî Zerîn Turk û serekê daîreyan, Taxa Cevat Paşa ya qezaya Sûrî de serdayîşê cinîyanê esnafan kerd.