Melek Avci/ Elfazî Toral

 

STENBOL – Hemsereka Partîya Voltî ya Îtalya Danîela Pattî ard ziwan ke têkoşînê şarê kurdî êdî mîsyonêk şexsî nîyo, mîsyonêk sîyasî yê kolektîf o û va: “Semedê piştîdayîşê prosesê aştîye lazim o tifaqê xurt ê mîyanê şarê Ewropa û Rojhelatê Mîyanên de bibo. Mesajê Abdullah Ocalanî semedê Ewropa rayîrêk newe nîşan dano.”

 

DEM Partî 6-7ê kanûne de Stenbol de “Konferansê Aştî û Komelê Demokratîkî yê Mîyanneteweyî” viraşte. Prosesê Aştî û Komelê Demokratîkî ke Rayberê Şarê Kurdî Abdullah Ocalanî 27ê sibate de dest pêkerdbî, konferansî de bi tecrûbeyê dinya pîya ame munaqeşekerdiş. Baskî ra heta Efrîqayê Başûr, Sinn Feinî ra heta Îngilîstan, Qazaxistan û Belçîka xeylê kesî tewrê konferansî bîy.

 

Tesîrê konferansî domîyeno. Yew a kesa ke tewr bîye hemsereka Partîya Voltî ya Îtalya Danîela Pattî bî. Danîela Pattî ajansa ma rê qisey kerde.

 

‘Meseleya kurdî mîsyonêk sîyasî ya kolektîf a’

 

Danîela Pattî bale ante ser meseleya kurdî û va rayîro ke komeleyê kurdî taqîb keno û mesajo ke Rayberê Şarê Kurdî Abdullah Ocalanî konferansî de da zaf muhîm o û va: “No demo ke demokrasîyê Ewropa de şikinayîşêk yeno ciwîyayîş, goreyê mi ma eşkenê çîyê ke tîya yenê kerdene xeylê çî bimusê. Mîsal prosesê konfederalîzmê demokratîkî, no semedê komelêko newe îmkanêko gird o. Nê îmkanî semedê demokrasîyê Ewropa zî muhîm ê. Têkoşînê şarê kurdî meseleyêka şexsî nîya, mîsyonêk sîyasî ya kolektîf a ke Ewropa zî xeylê çî ci ra bimusa.”

 

‘Prosesê aştîye yê Tirkîya muhîm o’

 

Danîela Pattî va meseleya kurdî tenya sey meseleyêka mîyanênî nîna ercnayene û va: “Prosesê aştîye yê Tirkîya zaf muhîm o. Sewîyeya globalî de zî muhîm o. No proses do vurnayîşê herêmî bîyaro rayîr. La çîyo ke ma vînenê lazim o piştîdayîşêko xurt ê Ewropa bibo. Piştîdayîşê dewaya kurdî zaf muhîm a.”

 

‘Mesajê Abdullah Ocalanî zaf muhîm o’

 

Danîela Pattî bale ante ser mesajê Abdullah Ocalanî yê konferansî û va: “Mesajê Birêz Abdullah Ocalanî yê semedê awankerdişê ‘rayîrêk newe ke şono sosyalîzmî’ zaf muhîm o. Heyetê mîyanneteweyî ke semedê piştîdayîşî ameyî tîya, bi esasî semedê musayîşî û çîyê ke musayî berê Ewropa ameyî tîya. Semedo ke ma nê prosesan, nê munaqeşan rê hewce yê. Nê munaqeşeyî welatanê ma de zî yenê kerdene.”

 

Danîela Pattî helwestê sîyasî ser û etîkî yê ke aştî bîyarê herême vinderte û va: “Ewropa de ma wareyê pawitişê vîrê komelî de zehmetîyê gird ancenê. Şerê Rojhelatê Mîyanênî, qirkerdişê Xozayî. No demê Şerê Dîyin ê Dinya û Holokostî de Ewropa de amebi ciwîyayîş. No bêguman hetê xeylê kesan ra beno sebebê piştîdayîşê prosesî. La hîn hetê çepî nê qebûl nêkenê. Na rewşêka têmîyanên a. Ma nêeşkenê na mesela de qalê helwestêko zelal ê Ewropa bikerê. Yewîya Ewropa hewl dana veng bivejo la hîn welatî helwestê cîya mojnenê. Mîsal Îspanya û Îtalya. Na meselayêka vîrî ya. Eynî demî de berjewendîyê ekonomîkî zî muhîm o. Semedê nê zî bi helwestê sîyasî û kulturî pîya berjewendîyê ekonomîkî rasterast tesîr kenê.”

 

‘Ma eşkenê çîyê ke Kurdistan de yenê ciwîyayîş xeylê çî bimusê’

 

Danîela Pattî va: “Ma Partîya Volt konfederalîzmê demokratîkî esas gênê. Ma Ewropa de bi federalîzmê Ewropa bawer kenê. No bi esasî sey konfederalîzmê demokratîkî yê Kurdistanî yo. Ganî ma hewl bidê ke merdim nê wareyî de zêdeyêr agahîdar bibo. Merdimî nê zaf nêzanê. Tersenê. Goreyê mi paradîgmaya ‘komela demokratîk – neteweya demokratîk’ baş nêameyî fehmkerdene. Ganî ma nê baş bidê nasnayene. Ma eşkenê çîyê ke Kurdistan de yenê ciwîyayîş xeylê çî bimusê. Bi esasî çîyê ke ma hewceyê înan yê eynî çî yê. Ganî ma sîstemêko ke prosesêko demokratîk û tewrîbîyayeyî taqîb keno û çarçewayêka hîra esas gêno awan bikerê.”

 

Danîela Pattî peynîya qiseykerdişê xo de dîyar kerde ke konferans semedê awankerdişê tifaqê mîyanê komelê kurdî û komelê mîyanneteweyî de zaf muhîm o û va: “Bi xêrê vatişê Birêz Ocalanî hedef no yo ke bi hevalkarîya komelêko demokratîk aştî bêro viraştiş. Semedê nê zî heqê têduştî çin bo aştî zî çin a. No pêvînayîşê aştîye ke yeno domnayene de esaso yewine yo.”