Devrîm Findik

 

STENBOL - Akademîsyena Zanîngeha Offî Ferda Fahrioglu ard ziwan ke ganî awankerdişê aştîye esasê têduştîya cinsî ser o bibo û ganî cinî heme wareyan de rolê aktîf bigîrê.

 

Beyanatê aştîye ke serra 2016ine de hetê akademîsyenanê Tirkîya ra ame weşaneyene, zordarî û sînorkerdişê azadîya akademîkî mojna. Akademîsyenê ke Tirkîya ra amey surgunkerdiş zî semedê domnayîşê karê xo teberê welatî de xebatê aktîfî domnenê.

 

Akademîsyena Zanîngeha Offî Ferda Fahrioglu ya ke semedê îmzekerdişê beyanatî karê xo ra ameye îxrackerdiş, derheqê Prosesê Aştî û Komelê Demokratîkî û zordarîya akademîyan ser de ercnayîş kerde.

 

Armancê Tora Aştîye ya Rexnegir

 

Ferda Fahrîoglu derheqê Tora Aştîye yê Rexnegir de qisey kerde û va, armancê înan no yo ke waştişê şarî bigîrê biresnê ê kesanê ke qerar danê û va: “Demo ke ma na tore awan kerde hema prosesê aştîye meydan de nêbî. Demo ke ma resayî proses wina dest pêkerd. Stenbol de Konferansê Aştîye virazîyaye. Armancê ma no bi ke semedê awankerdişê aştîye ajandayêk bêro awankerdiş.”

 

Tehdîdê herêmî

 

Ferda Fahrîoglu ard ziwan ke mutabakatê 10ê adare ke Sûrîye de ame kerdene girêdayê prosesê Tirkîya de domîyeno û va: “Bi sîyasetê Îsraîlî û piştîdayîşê DYAyî qirkerdişî yenê kerdene. Prosesê pêrodayîşî ke dinya de domnenê prosesê aştîye yê Tirkîya ra xoser nînê ercnayene. Sebebê destpêkerdişê nê prosesî o bî ke Tirkîya hemverê tehdîdê herêmî xurt vindero. Ma sey akademîsyenî demo ke ma qalê meselaya kurdî kenê, tesîrê hêzanê mîyanneteweyî zî peygoş nêkenê. Semedê ke dinya de vurnayîşê rejîmêko raştgir est o û Tirkîya nê ra xoser nîya.”

 

‘Aştîyêka hîra ganî bêro viraştiş’

 

Ferda Fahrioglu dîyar kerd ke akademîsyenê ke 2016ine de ameyî îxrackerdiş 2016ine ra hetanî nika têkoşînê huqûqî danê û va: “Akademî nika binê zordarîye de ya. Na rewşa rayîr akerdişê vernîya apolîtîkbîyayîşê akademîye akerd. Derdê ma no yo ke aştîyêka ke heme hetî gêna mîyanê xo ya. Ganî aştîyêka hîra bêra viraştiş. Ganî heme hetan bigîro mîyanê xo. Eynî wextî de zî ganî awankerdişê aştîye esasê têduştîya cinsê komelî ser o bibo. Ganî heme cinî proses de rolê aktîf bigîrê. Têkoşînê aştîye, têkoşînê cinîye ra cîya nîno destgirewtiş.”